Tags-Dil

bujhī dikhā.ī to detī hai aag ulfat kī
magar vo dil ke kisī goshe meñ dabī hogī

allāh rī dil-farebī jalvoñ ke bāñkpan kī
mahfil meñ vo jo aa.e kaj ho ga.iiñ kulāheñ

kaise dil lagtā haram meñ daur-e-paimāna na thā
is liye phir aa.e ka.abe se ki mai-ḳhāna na thā

ḳhizāñ nasīb daur meñ bahār kī tasalliyāñ
magar vo dil jise hai ḳhār-o-ḳhas kā aasrā bahut

nafrat bhī usī se hai parastish bhī usī kī
is dil sā koī ham ne to kāfar nahīñ dekhā

jo mire dil meñ hai kahne dījiye
yā mujhe ḳhāmosh rahne dījiye

har ek zarra hai māmūra-e-jamāl-e-habīb
dil-e-hazīñ nigah-e-kāmyāb paidā kar

dil-o-nigāh ko dhoke bhī raas aa.e haiñ
vufūr-e-tishna-labī meñ sarāb paidā kar

pahuñch buland-maqāmāt-e-sher-o-naġhma tak
adab meñ ek dil-āvez baab paidā kar

ġharaz to ye hai tirā markaz-e-nigāh rahūñ
sukūn-e-dil na sahī iztirāb paidā kar

jab bhī sāmān-e-sukūn-e-dil-o-jāñ hone lagā
choT khaa.ī thī kabhī is kā gumāñ hone lagā

haañ ham ne bhī aaj kisī kā nāzuk sā dil toḌā hai
shahr-e-vafā kī rasm yahī hai ham is par sharmā.eñ kyuuñ

khiḌkī khiḌkī sannāTā hai chilman chilman tanhā.ī
chāhat kī mahfil meñ ab ham naqd-e-dil-o-jāñ laa.eñ kyuuñ

va.adoñ ke jañgal meñ 'āzar' ham to barsoñ bhaTke haiñ
aap kareñ kyuuñ dil pe bharosa aap ye dhoka khā.eñ kyuuñ

jis par aa.ī thī tabī.at kī usī ne kuchh na qadr
jins-e-dil mānind-e-jins-e-nāravā ulTī phirī

nāla-e-dil ne ḳhush-navā.ī meñ
ta.ana-e-saut hazār par maarā

zaḳhm pinhāñ dil-o-jigar meñ nahīñ
na khulā kyā idhar-udhar maarā

ham vo haiñ kushta-e-tamannā 'shād'
ḳhvāhish-e-dil ko umr-bhar maarā

dil kā kyā hai dil ne kitne manzar dekhe lekin
āñkheñ pāgal ho jaatī haiñ ek ḳhayāl se pahle

miyān-e-āb-o-gil ik barq hai sho.ala hai shabnam hai
ye dil ye qatra-e-ḳhūñ ye vajūd-e-muḳhtasar terā