Tags-Dil

zarā sā dard huā thā ki dil chamak uTThā
zarā sī sub.h huī thī ki din nikal aayā

karishma-e-husn dāman-e-dil ko khīñchtā hai qadam qadam par
satā.ish-e-ḳhāl-o-ḳhad kī mī.ād muḳhtasar hai sitam to ye hai

pyaar vafā kā chalan na ho gar dil se dil ko raah na ho
aisī ravish to is duniyā ko kar degī maj.hūl miyāñ

naḳhl-e-duā kabhī jab dil kī zamīñ se nikle
saa.e bhī kuchh gumāñ ke barg-e-yaqīñ se nikle

jin kī yādeñ haiñ abhī dil meñ nishānī kī tarah
vo hameñ bhuul ga.e ek kahānī kī tarah

haiñ pashemāñ vo mo.attal tujhe kar ke ai dil
ġham na kar phir usī mansab pe bahālī hogī

uThte dekhā jo tum ko pahlū se
dard bhī uTh khaḌā huā dil kā

mire dil meñ ġham kā jo ḳhaar hai mirā dil usī pe nisār hai
jise mere dard kā dard ho usī mehrbāñ kī talāsh hai

kisī dil meñ koī makīn hai kisī dar pe koī jabīn hai
jahāñ ho na koī mire sivā mujhe us makāñ kī talāsh hai

ham aql dil ke sāmne rakhte rahe vale
dariyā ke aage ret kī dīvār kyā kare

har-sū hai kā.enāt meñ apne lahū kā rañg
ho chashm-e-dil se duur to dīdār kyā kare

kahtā huuñ baar baar samajhtā nahīñ koī
bahrā ho dil to baat pe isrār kyā kare

mehrbāñ raat ke saa.e the munavvar aise
ashk āñkhoñ meñ liye dil ye sarāsīma thā

maiñ tañgī-e-makāñ se na ho jā.ūñ tañg-dil
apnī tarah mujhe bhī koī lā-makān de

dāġh-e-dil zau-fishāñ hue yuuñ ki
shams o mahtāb dekhte haiñ mujhe

phir umaD aa.e haiñ yādoñ ke suhāne bādal
phir dil-e-zār meñ ik sho.ala-e-armāñ jaagā

tum se bichhḌe sadiyāñ bītīñ
lekin dil meñ yaad tumhārī

shauq hī shauq hai nahīñ mālūm
is se kyā dil nihād hai ham ko

shaiḳh o pīr-e-muġhāñ kī ḳhidmat meñ
dil se ik e'tiqād hai ham ko

dil meñ ik jazba-e-bedād-o-jafā hī hogā
vo ḳhudā-vand bhī hogā to ḳhudā hī hogā