Tags-Dil

be-tarah paḌtī hai nazar un kī
ḳhair dil kī nazar nahīñ aatī

dil vāloñ se sunte the kabhī qissa-e-duniyā
ab dil kī kahānī bhī sunāte haiñ adākār

kaash ham ko bhī batā deñ ye batāne vaale
choT lagtī hai koī dil pe to kyā karte haiñ

tarjumānī kā vasīla to haiñ dar-asl ye ashk
dil ke matlab ko ham āñkhoñ se adā karte haiñ

apne ham-rāh jalā rakkhā hai
tāq-e-dil par jo diyā rakkhā hai

haiñ kahāñ aah vo hūrān-e-tasavvur jin se
dil thā ġhairat-dah-e-gulzār-e-jināñ aaj kī raat

sāmne koī nahīñ rūh-navāz-e-dil-o-jāñ
zindagānī kī tamannā hai garāñ aaj kī raat

dil to hāzir hai agar kījiye phir naaz se ramz
haiñ tire naaz ke sadqe isī andāz se ramz

dil ko tū sahj meñ levegā ye maiñ jaan chukā
yahī niklī haiñ tirī sahj kī āvāz se ramz

dil se lab tak aate aate lafz badal jaate haiñ ab
pahle aa jaatī thī hoñToñ par ḳhālis sachchī āvāz

ek se haiñ ādāb zabāñ-bandī ke har ik mahfil meñ
sabr kā jaam uThā ai dil aur ḳhāmoshī se pī āvāz

tū ne yuuñ dekhā hai jaise kabhī dekhā hī na thā
maiñ to dil meñ tire qadmoñ ke nishāñ tak dekhūñ

dil gayā thā to ye āñkheñ bhī koī le jaatā
maiñ faqat ek hī tasvīr kahāñ tak dekhūñ

rakkhā thā jise dil meñ vo ab hai bhī nahīñ bhī
yūñhī mire jiine kā sabab hai bhī nahīñ bhī

vo pīpal ke tale TuuTī huī mehrāb kā manzar
dikhā detā hai mujh ko ik dil-e-betāb kā manzar

dil par lagā rahī hai vo nīchī nigāh choT
phir choT bhī vo choT jo hai be-panāh choT

uThte hī dil meñ Tiis jigar meñ Tapak huī
kartī hai dard-e-hijr se goyā nibāh choT

dil jo de kar kisī kāfir ko pareshāñ ho jaa.e
āfiyat us kī hai is meñ ki musalmāñ ho jaa.e

agarche pāmāl haiñ ye bahreñ magar suḳhan hai buland hamdam
na dil meñ laanā gumān-e-pastī mirī zamīñ āsmāñ nahīñ hai

le gayā chhīn ke kaun aaj tirā sabr o qarār
be-qarārī tujhe ai dil kabhī aisī to na thī