terī manshā hai ḳhāmoshī merī hai marzī āvāz
aao mil kar aaj banā.eñ ham koī farzī āvāz
chhāgal bhī labrez hai ab to lekin merī gūñgī pyaas
terī ok se piinā chāhe ThanDe chashme kī āvāz
kis kī ho zarḳhez samā.at kis kī banjar kyā ma.alūm
bhaTke har ik samt TaTole har rasta andhī āvāz
dil se lab tak aate aate lafz badal jaate haiñ ab
pahle aa jaatī thī hoñToñ par ḳhālis sachchī āvāz
ek se haiñ ādāb zabāñ-bandī ke har ik mahfil meñ
sabr kā jaam uThā ai dil aur ḳhāmoshī se pī āvāz
uzr usuul javāz ke charḳhe kaat rahā hai har koī
tū bhī apnī majbūrī kā dhāgā le aur sī āvāz
vahī musalsal beach hamāre ek masāfat kī duurī
vaise har ik moḌ pe ruk ke us ne ham ko dī āvāz
zer-e-lab kuchh maañg rahe the sab kashkol liye jis se
us ne pheñkī mere kaase meñ sab se ūñchī āvāz
soch rahī huuñ naam pe apne chauñk ke pīchhe muḌte hue
vahm thā merā yā phir sach-much terī hī vo thī āvāz
gahrī ḳhāmoshī meñ bahte be-ābād jazīroñ se
kis ne merā naam pukārā kis ne mujh ko dī āvāz