Tags-Dil

terī jo yaad ai dil-ḳhvāh bhūlā
billāh bhūlā vallāh bhūlā

furqat kī shab meñ jāñ-soz dil ne
uff uff kiyā jo aah aah bhūlā

kaj rakh na pā ko jā dil se ġhāfil
pher us ne khāyā jo raah bhūlā

phūTī haiñ jis jagah mirī āñkhoñ kī koñpleñ
dil se pare vo ḳhitta-e-shādāb aur hai

duniyā pasand aane lagī dil ko ab bahut
samjho ki ab ye baaġh bhī murjhāne vaalā hai

sitāra hai koī gul hai ki dil hai
tirī Thokar meñ patthar muḳhtalif hai

vo dil-rubā se jo sapne the le uḌiiñ nīndeñ
dhanak-nagar se vo dhundlā sā rābta bhī gayā

baḌā sukūn milā aaj us ke milne se
chalo ye dil se tavaqqo.a kā vasvasa bhī gayā

hameñ to ek nazar nashr kar ga.ī 'anvar'
hamāre haath se dil kā musavvada bhī gayā

dil bhī lauh-o-qalam kā ham-sar hai
dāstāneñ haiñ kitnī dil pe raqam

hazār kos nigāhoñ se dil kī manzil tak
koī qarīb se dekhe to ham ko pahchāne

tujhe kyā huā hai batā ai dil na sukūn hai na qarār hai
kabhī us hasīn kī chaah hai kabhī us nigār se pyaar hai

nazar ko vaqf-e-hairat kar diyā hai
use bhī dil se ruḳhsat kar diyā hai

sab samajhte haiñ maiñ kahūñ na kahūñ
is dil-e-be-qarār kī bāteñ

chheḌ detā huuñ dil-lagī ke liye
vasl meñ intizār kī bāteñ

dil-nashīñ haiñ basant meñ 'kaifī'
ye sharāb-o-ḳhumār kī bāteñ

rañgīniyāñ shabāb kī itnī haiñ dil-fareb
bāloñ pe aatī dhuup dikhā.ī na de mujhe

rahne de zikr-e-ḳham-e-zulf-e-musalsal ko nadīm
us ke to dhyān se bhī hotā hai dil ko uljhāo

batā ai husn kab tak ishq kī taqdīr meñ āḳhir
ba-minnat dil diyā karnā ba-hasrat muñh takā karnā

na dil vāpas na dildārī ye kyā sheva hai tum ko to
na aayā qarz adā karnā na aayā farz adā karnā