Tags-Dil

jalegā dil tumheñ bazm-e-adū meñ dekh kar merā
dhuāñ ban ban ke armāñ mahfil-e-dushman se nikleñge

us ne jab haath milāyā to lagā
dil meñ ik phāñs purānī hai abhī

ġham kī be-panāhī meñ dil ne hausla paayā
tīrgī ke jañgal meñ chashma-e-ziyā paayā

kis kis kā dil dhaḌkegā aur kaun malegā hāthoñ ko
pakkīñ se jab añgiyā meñ ye kachche seb uchhālegī

sonā ruupā sīm-o-javāhir sabr o dil o diiñ hosh-o-qarār
aañkh uThā kar dekhte hī ek aan meñ sab rakhvā legī

dil rashk-e-adū se hai sipand-e-sar-e-ātish
ye sham.a tirī bazm meñ jaltī hī rahegī

ab to ye aarzū hai ki vo zaḳhm khā.iye
tā-zindagī ye dil na koī aarzū kare

dil meñ hamāre hasrat-o-armāñ kā hai hujūm
kaise kaheñ ki ham pe koī mehrbāñ nahīñ

kar arz-e-mudda.ā magar ai dil rahe ḳhayāl
inkār kar diyā to karegā vo haañ nahīñ

kabhī surḳhī se likhtā huuñ kabhī kājal se likhtā huuñ
maiñ dil kī baat jazboñ kī harī koñpal se likhtā huuñ

maiñ terā naam jab likhtā huuñ apne dil kī taḳhtī par
gulāb-o-mushk se zamzam se gañgā-jal se likhtā huuñ

dāġh-e-kam-hauslagī dil ko gavārā na huā
varna kuchh hijr meñ dushvār na thā mar jaanā

sach hai tū ne kabhī mujh ko chāhā na thā
dil kahāñ, ek hone kī sūrat kahāñ

ai shauq patā kuchh tū hī batā ab tak ye karishma kuchh na khulā
ham meñ hai dil-e-betāb nihāñ yā aap dil-e-betāb haiñ ham

kuchh sahārā bhī hameñ roz-e-azal ne na diyā
dil badalne na diyā baḳht badalne na diyā

koī to merā bhī hogā muntazir 'bāqī' yahāñ
ik na ik to dil kā darvāza khulā mil jā.egā

usī dard-āshnā dil kī taraf-dārī meñ rahte haiñ
ham apne-āp meñ gum apnī ġham-ḳhvārī meñ rahte haiñ

yūñhī ham rafta rafta dil-girafta hote jā.eñge
ki ham apne ġhamoñ kī nāz-bardārī meñ rahte haiñ

ye duniyā ham ne duniyā-dār kī āñkhoñ se dekhī hai
magar ai dil ham apnī hī amal-dārī meñ rahte haiñ

bahal na jaa.e kahīñ ye dil-e-ḳhizāñ-mānūs
bahār aa ke dikhātī hai dilkashī apnī