Tags-Dil

dil-e-nā-mutma.in andesha-e-barq-e-tapāñ meñ hai
jo be-tābī qafas meñ thī vahī ab āshiyāñ meñ hai

mirī be-tābi-e-dil kī samajh meñ kuchh nahīñ aatā
ḳhudā jaane tirā harf-e-tasallī kis zabāñ meñ hai

paanī se sag-gazīda Dare jis tarah 'asad'
Dartā huuñ aa.ine se ki mardum-gazīda huuñ

gulshan-e-firdaus par kyā naaz hai rizvāñ tujhe
pūchh us ke dil se jo hai rutba-dān-e-lucknow

fees letā hai dil milāne kī
aur isī kaam par ''guzārā'' hai

kis darja dil-shikan the mohabbat ke hādse
ham zindagī meñ phir koī armāñ na kar sake

phir tifl-e-dil hai daulat-e-duniyā pe girya-bār
aur mere paas koī khilaunā nahīñ hai aaj

tujhe bhulā deñge apne dil se ye faisla to kiyā hai lekin
na dil ko mālūm hai na ham ko jiyeñge kaise tujhe bhulā ke

laakh laakh ehsān jis ne dard paidā kar diyā
jis ne is dil ko hathelī kā phaphūlā kar diyā

dil bahut bechain be-ārām hai
kyā mohabbat kā yahī anjām hai

himmat vaale pal meñ badal dete haiñ duniyā ko
sochne vaalā dil to baiThā sochā kartā hai

ashkoñ ke sailāb-e-ravāñ ko 'akbar' mat roko
bah jaa.e to buujh ye dil kā halkā kartā hai

ḳhafā kījiye ab na 'aḳhtar' ko sāhab
ye dil lījiye aur kyā lījiyegā

chehre pe sajā laayā huuñ maiñ dil kī sadā.eñ
duniyā meñ koī ahl-e-nazar hai ki nahīñ hai

na kuchh aalim samajhte haiñ na kuchh jāhil samajhte haiñ
mohabbat kī haqīqat ko bas ahl-e-dil samajhte haiñ

vo jis ko zehn se jhaTkā diyā thā
vo ḳhvāhish dil meñ ghar paane lagī hai

aisā āshob-e-zamāna hai ki Dar lagtā hai
dil ke mazmūñ hī na ash.ār meñ gum ho jaa.eñ

yuuñ raat ko hotā hai gumāñ dil kī sadā par
jaise koī dīvār se sar phoḌ rahā ho