Tags-Dil

maiñ suḳhnavar bhī nahīñ fan kā salīqa bhī nahīñ
zaḳhm haiñ dil ke jo naġhmāt meñ Dhal jaate haiñ

dāstān-e-shauq-e-dil aisī nahīñ thī muḳhtasar
jī lagā kar tum agar sunte maiñ kahtā aur bhī

dasht-e-dil meñ sarāb taaza haiñ
bujh chukī aañkh ḳhvāb taaza haiñ

dāstān-e-shikast-e-dil hai vahī
ek do chaar baab taaza haiñ

koī mausam ho dil-gulistāñ meñ
aarzū ke gulāb taaza haiñ

zaḳhm-dar-zaḳhm dil ke khāte meñ
dostoñ ke hisāb taaza haiñ

nāzuk thā āb-gīna-e-dil TuuT hī gayā
tū ab na ho malūl tirā kyā qusūr hai

maiñ us ko bhuul gayā huuñ vo mujh ko bhuul gayā
to phir ye dil pe kyuuñ dastak sī nā-gahānī huī

dil tumhārā bhī hai gudāḳhta kyā
yuuñ to dā.ūdī sī sadā ho tum

dil tarafdār-e-hijr thā hī nahīñ
ab huā bhī to be-dilī se huā

us ke har halqe meñ haiñ dil se pareshānoñ ke saath
ye na kah hamdam ki zulf us kī bikharne se na Dar

dil diyā tū ne 'muhib' ab ḳhauf hai kis chiiz kā
do-do bāteñ zehn se jis vaqt karne se na Dar

kahāñ qismat meñ is kī phuul honā
vahī dil kī kalī hai aur ham haiñ

dil lagāne kī bhuul the pahle
ab jo patthar haiñ phuul the pahle

nisāb-e-zindagī jis meñ likhā hai
kitāb-e-dil vo baste meñ paḌī hai

laave ḳhātir meñ hamāre dil ko vo maġhrūr kyā
jis ke aage mahr kyā mah kyā parī kyā huur kyā

dil nayā ham ne lagāyā hai batā do mehrbāñ
us kī hai rah kyā ravish kyā rasm kyā dastūr kyā

thoḌā sā kaḌā gar dil ko karūñ ādāt badal to saktī haiñ
par asl musībat to ye hai ādāt kī niyyat Thiik nahīñ

dil ko dariyā ko baḌī der huī ḳhushk hue
koī bādal hī mirī pyaas bujhāne aa.e

shauq-e-dil-e-vārafta kā ik said-e-zabūñ huuñ!
khultā hī nahīñ bhed ki maiñ kaun huuñ kyuuñ huuñ