Tags-Dil

aahaT ho koī us kī taraf dauḌe jaate haiñ
tāḳhīr ek pal kī bhī ab dil pe baar hai

dil ko jalā.e rakkhā hai ham ne charāġh sā
is ghar meñ ham haiñ aur tirā intizār hai

us mārpech kūche meñ kākul ke dil hai ġham
jis meñ ki rāh-e-ḳhizr ne akasr kiyā ġhalat

husn daulat dost duniyā dil nazar har ek shai
chhoḌ jā.ūñgā tirī ḳhātir ye sab ai zindagī

dil dhaḌaktā hai to uThtī haiñ badan meñ Tīseñ
ishq ne bāñdh ke maarā hai, ḳhudā jāntā hai

mohabbat meñ bhī dil vaale siyāsat kar ga.e 'aslam'
gale meñ haar Daale paañv meñ zanjīr pahnā.ī

adam ke jaane vaale qāfile din-rāt chalte haiñ
magar is anjuman kī dilkashī kuchh kam nahīñ hotī

nahīñ vāqif tū ai dil ātish-e-soz-e-mohabbat se
ye daulat jis qadar aatī hai ghar meñ kam nahīñ hotī

shukr-e-allah sarv-e-rānā ke tasavvur ke tufail
rafta rafta dil mirā bāġh-e-iram hone lagā

hazār baar kahā dil se maañg le kuchh to
yahī javāb milā māñgnā nahīñ aatā

maiñ jis ḳhvāb meñ rahtā huuñ pahle us ḳhvāb tak aayā vo
phir us ḳhvāb se dil ke raste merī kitāb tak aayā vo

us kī ḳhātir chashm o dil o jaañ farsh-e-rāh to karnā tujhe
us jañgal meñ 'ḳhāvar' mujh se ḳhāna-ḳharāb tak aayā vo

saath rah kar bhī duur duur hai tū
zindagī kī ye dil-lagī to dekh

maiñ 'qaisar' apnī āñkhoñ se Tapak kar
kisī dil meñ utartā jā rahā huuñ

is dil ke TūTne kā mujhe koī ġham nahīñ
achchhā huā ki paap kaTā dard-e-sar gayā

mujhe ḳhushī hai mirī us se rasm-o-rāh nahīñ
vo shaḳhs dil se kisī kā bhī ḳhair-ḳhvāh nahīñ

kaise dil kā kahā batā.eñ ham
raaz kī baat kyā batā.eñ ham

jab koī Tiis dil dukhātī hai
nabz kuchh der ruk sī jaatī hai

be-tamannā.ī meñ āsūda thā yārab kyā kiyā
kis liye mere dil-e-dīvāna ko daanā kiyā

ek jazba thā azal se gosha-e-dil meñ nihāñ
ishq ko is husn ke bāzār ne rusvā kiyā