Tags-Dil

jhūTī sachchī jo jī chāhe kahte jaao
kaun kisī ke dil meñ utrā jaatā hai

hasrat-o-yās-o-ġham-o-ranj haiñ mehmāñ dil meñ
kitnā ābād hai allāh kā ghar bhī dekho

zinda rahne kī tamannā ho to phir kyā kuchh na ho
dil ke sannāTe pe mujh ko e'tibār-e-naġhma hai

kis se kiije aur kyuuñ kiije bayān-e-soz-e-dil
ye bharī duniyā to yaaro pāsdār-e-naġhma hai

pyaar kā iqrār dil meñ ho magar
koī pūchhe to mukarnā chāhiye

hāl-e-dil 'mehr' kā khulā hamdam
dard hamdard-e-dil huā hamdam

dard ham ko huā davā hamdam
aur lillāh dil dukhā hamdam

dil kā hāsil ho mudda.ā hamdam
rahm kar aa idhar ko aa hamdam

hogā ma.alūm hāl-e-rūh allāh
la.al-e-dil-dār gar hilā hamdam

dil kā vo haal is kā vo aalam
kis kā ho ham ko aasrā hamdam

kahāñ mere dil kī hasrat, kahāñ merī nā-rasā.ī
kahāñ tere gesuoñ kaa, tire dosh par bikharnā

dil-mohalla ġhulām ho jaa.e
koī is kā imaam ho jaa.e

kitne hī dil ḳharīdtā hai vo
ek halkī sī muskurāhaT se

yuuñ kahne ko pairāya-e-iz.hār bahut hai
ye dil dil-e-nādāñ sahī ḳhuddār bahut hai

us said ko kyā kahiye jo ḳhud aa.e tah-e-dām
dil meñ liye ik hasrat-e-parvāz kā aalam

thā is se pahle bhī koī makīn-e-dil apnā
aur is ke baad bhī ḳhālī nahīñ makān miyāñ

apne dil kī aadat hai shahzādoñ vaalī
jaltī rakhtā hai qindīl murādoñ vaalī

dil ke taaq meñ rozāna hī sajātā huuñ maiñ
ik din dekhī mūrat surḳh libādoñ vaalī

kyuuñ na rahe is dil meñ us kī kirchī
ik tamsīl jo dekhī thī fariyādoñ vaalī

khiñchī huī haiñ ufuq se dil tak alāmat-e-vasl kī lakīreñ
magar ye zinda ka.ī qabīloñ kā ḳhuuñ bahāne ke baad hoñgī