Tags-Dil

ek bastī ishq kī ābād hai dil ke qarīb
lekin is bastī ke raste kis qadar pechīda haiñ

dil ke zaḳhmoñ ko harā karte haiñ
kyuuñ tujhe yaad kiyā karte haiñ

phuul aa.e haiñ na.ī rut ke na.ī shāḳhoñ par
mauja-e-māh-e-dil-e-ārām kī baarī aa.ī

jhichkā vo ḳhauf khā ke to maiñ ne taḌap ke ḳhud
barchhī kī nok par dil-e-nākām rakh diyā

dilchasp naam sun ke lage māñgne hasīñ
kis ne zarā se ḳhuun kā dil naam rakh diyā

itnī to us ne kī mirī dil-soziyoñ kī qadr
turbat pe ik charāġh sar-e-shām rakh diyā

juuḌā jo bañdh gayā to na.e dil kahāñ phañseñ
tū ne idhar lapeT ke kyuuñ daam rakh diyā

raat jugnū chāñd-tāroñ kā hujūm
dil pareshāñ chain kyuuñ paatā nahīñ

kis liye un ke tasavvur kā tilism
ab dil-e-'mushtāq' bahlātā nahīñ

mire dāġh-e-dil kī tābish jo kabhī ye dekh paa.eñ
vahīñ rashk-e-be-amāñ se mah-o-mehr Duub jaa.eñ

kāñToñ se bharā hai dāman-e-dil shabnam se sulagtī haiñ palkeñ
phūloñ kī saḳhāvat kyā kahiye kuchh yaad rahī kuchh bhuul ga.e

vo na aa.egā magar dil ye kahe jaatā hai
us ke aane kā abhī shor sunā.ī degā

dil kā ā.īna huā jaatā hai dhundlā dhundlā
kab tirā aks ise apnī safā.ī degā

ilm se raushan to hai un kā dimāġh
dil ke goshe haiñ magar tārīk se

jis kā maqsad adl o amn o ātishī
dil hai vābasta usī tahrīk se

be-sabab 'rāġhib' taḌap uThtā hai dil
dil ko samjhānā paḌegā Thiik se

ye ḳhaak buġhz-o-adāvat se paak rakhnī thī
zamīn-e-dil pe shajar pyaar kā ugānā thā

hairāñ hai zamāne meñ kise apnā kahe dil
chehre to haiñ gul-rañg magar khoT bhare dil

kis samt liye jaatā hai ye daur-e-taraqqī
dhātoñ ke hue jism to patthar ke bane dil

ġhuncha hai to chaTke vo sitārā hai to chamke
betāb hai siine meñ dhaḌakne ke liye dil