Tags-Dil

dil kī bigḌī huī sūrat hai yahāñ
ab koī aur ḳharāba dekho

saada kāġhaz kī tarah dil chup hai
hāsil-e-rañg-e-tamannā dekho

sukūt-e-arz-o-samā parda-hā-e-shorish-e-dil
khulā ki ġhalġhala-e-al-amāñ to kuchh bhī nahīñ

shu.ūr-e-chashm-o-dil-o-jāñ nisārī-e-āshiq
agar hai ḳhāliq-e-nām-o-nishāñ to kuchh bhī nahīñ

hūr-e-jannat un se kuchh baḌh kar sahī
ek dil kyā kyā tamannā kījiye

hāl-e-dil kuchh jo sar-e-bazm kahā hai maiñ ne
vo ye samjhe haiñ ki ilzām diyā hai maiñ ne

tum ne duniyā kī tarah aañkh firā.ī hai to kyā
ye bhī ik jabr isī dil pe sahā hai maiñ ne

qīmat agar vo dete haiñ takrār bhī nahīñ
kuchh ham ko dil ke dene meñ inkār bhī nahīñ

saudā tamām ho gayā bāzār uTh gayā
vo dil bhī ab nahīñ vo ḳharīdār bhī nahīñ

tarz-e-jafā bhī bhuul ga.ī kyā vafā ke saath
dil-dār gar nahīñ ho dil-āzār bhī nahīñ

vaqt kaT jaa.e agar ālam-e-tanhā.ī meñ
dil meñ ehsās-e-mulāqāt hī mar jaatā hai

hazār gardaneñ ḳham hoñ burā nahīñ pe sitam hai
ḳhayāl-o-fikr kī pastī nigāh-o-dil kā jhukāo

ājizī kahne lagī gar ho bulandī kī talab
dil jhukā dā.ira-e-na.ara-e-takbīr meñ aa

yahāñ tak dil ko aadat ho ga.ī hai be-qarārī kī
sukūn-e-zindagī meñ bhī taḌapnā kam nahīñ hotā

tumhārī yaad hī ke saath dhaḌkan baḌh ga.ī dil kī
tasavvur se mizāj-e-husn to barham nahīñ hotā

sūraj mirī nas nas meñ pighalne lagā yaaro
phir dil pe ġham-o-dard kī yalġhār rahegī

maiñ kise sunā.ūñ ye dāstāñ maiñ kise batā.ūñ ye mājrā
kisī nāznīñ kī har ik adā mire dil jigar meñ utar ga.ī

tumheñ yaad maiñ na karūñ kabhī tumheñ apne dil se nikāl duuñ
yahī kaam mujh se na ho sakā mirī zindagānī guzar ga.ī

kis qadar dil-nashīñ haiñ lab tere
bāda-e-ahmarīñ haiñ lab tere

havā.eñ tez thiiñ itnī ki ek dil ke sivā
koī charāġh sar-e-rahguzar jalā hī nahīñ