Tags-Dil

aaj tak vo dil kī dīvāroñ pe kanda haiñ 'bashīr'
phir nazar aa.eñ nahīñ jo māh-sīmā sūrateñ

utar jaate haiñ ruuh o dil meñ kitnī vus.ateñ le kar
ġhazal ke dilrubā lahjoñ kā andāza nahīñ hotā

pahlū meñ dil hai dard-e-mohabbat liye hue
baiThā huuñ kā.enāt kī daulat liye hue

naale nikal ke dil se agar arsh tak ga.e
jā.eñge ai falak ye tirī chhat liye hue

ik hūr-vash ke kūche kā 'sābir' hai dil pe naqsh
baiThā huuñ maiñ kanār meñ jannat liye hue

ḳhuun hai dil meñ tumhāre abhī afsurda-ḳhirām
surḳh kyuuñ hote haiñ ruḳhsār-e-chaman kyā jāno?

is dil ke darīda dāman ko dekho to sahī socho to sahī
jis jholī meñ sau chhed hue us jholī kā phailānā kyā

phir hijr kī lambī raat miyāñ sanjog kī to yahī ek ghaḌī
jo dil meñ hai lab par aane do sharmānā kyā ghabrānā kyā

karūñ huuñ shaad dil apnā tire tasavvur se
agar ye shaġhl na hotā to kyā kiyā kartā

ġham-e-firāq gar aisā maiñ jāntā 'bedār'
to apne dil ko kisī se na āshnā kartā

dil kī be-sūd taḌap jism kī māyūs pukār
chand roz aur mirī jaan faqat chand hī roz

dil meñ 'asġhar' ke ḳhushiyoñ kī barsāt thī
hañste hañste vo kyuuñ ġham-zada ho gayā

mil kar sanam se apne hañgām-e-dil-kushā.ī
hañs kar kahā ye ham ne ai jaañ basant aa.ī

vo zaḳhm chāhtā huuñ maiñ ai husn-e-dil-fareb
jis ko tirī nigāh bhī achchhā na kar sake

sarāpā tirā kyā qayāmat nahīñ hai?
idhar hashr sī dil kī hālat nahīñ hai

duniyā maqtal banī thī aur dil
apne hī ḳhayāl meñ magan thā

dil le ga.ī vo zulf-e-rasā kaam kar ga.ī
ka.aba ko Dah ga.ī ye balā kaam kar ga.ī

zāhid kī aañkh meñ to barahman ke dil meñ hai
tasvīr-e-but bhī nām-e-ḳhudā kaam kar ga.ī