chand roz aur mirī jaan faqat chand hī roz
zulm kī chhāñv meñ dam lene pe majbūr haiñ ham
jism par qaid hai jazbāt pe zanjīreñ haiñ
fikr mahbūs hai guftār pe tāzīreñ haiñ
lekin ab zulm kī mī.ād ke din thoḌe haiñ
ik zarā sabr ki fariyād ke din thoḌe haiñ
arsa-e-dahr kī jhulsī huī vīrānī meñ
ham ko rahnā hai pe yūñhī to nahīñ rahnā hai
ye tire husn se lipTī huī ālām kī gard
apnī do roza javānī kī shikastoñ kā shumār
dil kī be-sūd taḌap jism kī māyūs pukār
chand roz aur mirī jaan faqat chand hī roz