'inshā'-jī uTho ab kuuch karo is shahr meñ jī ko lagānā kyā
vahshī ko sukūñ se kyā matlab jogī kā nagar meñ Thikānā kyā
is dil ke darīda dāman ko dekho to sahī socho to sahī
jis jholī meñ sau chhed hue us jholī kā phailānā kyā
shab biitī chāñd bhī Duub chalā zanjīr paḌī darvāze meñ
kyuuñ der ga.e ghar aa.e ho sajnī se karoge bahānā kyā
phir hijr kī lambī raat miyāñ sanjog kī to yahī ek ghaḌī
jo dil meñ hai lab par aane do sharmānā kyā ghabrānā kyā
us roz jo un ko dekhā hai ab ḳhvāb kā aalam lagtā hai
us roz jo un se baat huī vo baat bhī thī afsānā kyā
us husn ke sachche motī ko ham dekh sakeñ par chhū na sakeñ
jise dekh sakeñ par chhū na sakeñ vo daulat kyā vo ḳhazānā kyā
us ko bhī jalā dukhte hue man ik sho.ala laal bhabūkā ban
yuuñ aañsū ban bah jaanā kyā yuuñ maaTī meñ mil jaanā kyā
jab shahr ke log na rastā deñ kyuuñ ban meñ na jā bisrām kare
dīvānoñ kī sī na baat kare to aur kare dīvānā kyā