Tags-Dil

nazar-navāz hai husn-e-ḳhajista-pai ab bhī
khaTak rahī hai magar dil meñ koī shai ab bhī

tum to ai mehrbān anūThe nikle
jab aan ke paas baiThe rūThe nikle

jin ke hone se ham bhī haiñ ai dil
shahr meñ haiñ vo sūrateñ baaqī

mere dil kī vus.ateñ añgḌā.iyāñ lene lagīñ
jalva dekhā jab tirā har moḌ par har gaam par

tujh ko dekhe phir aap meñ rah jaa.e
dil par itnā kisī ko qaabū hai

had na pūchho hamārī vahshat kī
dil meñ har daaġh chashm-e-āhū hai

dil jo be-mudda.ā ho kyā kahnā
yahī vīrāna ālam-e-hū hai

udāsī ke dhuñdlakoñ kā dimāġh-o-dil pe chhā jaanā
nazar ke sāmne ik gum-shuda manzar kā aa jaanā

ye kamtarī bartarī ke fitne ye ām-o-ālā ke sard jhagḌe
hamīñ ne naazo se dil meñ paale hamāre hī darmiyāñ se nikle

dil meñ 'nāsik' rah ga.ī haiñ aarzū kī do laveñ
ek ḳhush aadat sī laḌkī aur ik chhoTā sā ghar

umDā hai jo dil 'azīz' ro lo
aañsū koī roktā nahīñ hai

is qadar dhuup meñ shiddat thī ki ghabrā kar dil
saa.e kī aas meñ be-sāya shajar tak pahuñchā

girī thiiñ ghar kī dīvāreñ to sehn-e-dil meñ ham ko
gharauñde kā koī naqsha banānā chāhiye thā

koī to baat karnā chāhiye thī ḳhud se āḳhir
kahīñ to mujh ko bhī ye dil lagānā chāhiye thā

us kī āñkhoñ meñ vahī rañg vahī husn-e-talab
dil ko samjhā.eñ magar fā.eda samjhāne kā

tujhe dil meñ basā.eñge tire hī ḳhvāb dekheñge
miTeñge terī chāhat meñ vafā ke baab dekheñge

ye ajiib kashmakash hai ki haiñ ham baham muqābil
mirā dil tirā nishāna tirā dil mirā nishāna

tirī chaah thī jo dil meñ vahī ruuh thī badan meñ
ye idhar huī ravāna vo udhar huī ravāna

mirā dil jalāne vaale zarā is pe ġhaur kar le
mirā dil nahīñ hai zālim hai ye terā āshiyāna

zard mausam to kahīñ saḳht qavā.ed jānāñ
naġhma kuchh aur nahīñ dil ko dukhāne vaalā