Tags-Dil

TukḌe ka.ī ik dil ke maiñ aapas meñ siye haiñ
phir sub.h talak rone ke asbāb kiye haiñ

ḳhushī se ziist kā har dukh uThā.e jaate haiñ
ham ahl-e-dil kī rivāyat nibhā.e jaate haiñ

māzī-o-dosh kā har daaġh hai fardā kā charāġh
kaash ye shām-o-sahar sirf dil-o-jāñ hote

dil kyuuñ dhaḌakne lagtā hai ubhre jo koī chaap
ab to nahīñ kisī kā mujhe intizār bhī

ātish-e-ġham ne magar phūñk diyā
dil se shole jo uThā karte haiñ

hote haiñ dil meñ nihāyat nādim
ḳhuun jo be-jurm kiyā karte haiñ

evaz-e-bāda ġham-e-sāqī meñ
ḳhūn-e-dil apnā piyā karte haiñ

vo dil kī baazī jahāñ mujh se jītnā chāhe
maiñ maan lūñgā vahīñ maat us se kah denā

mire dil ko shauq-e-fuġhāñ nahīñ mire lab tak aatī duā nahīñ
vo dahan huuñ jis meñ zabāñ nahīñ vo jaras huuñ jis meñ sadā nahīñ

har-dil-azīz vo bhī hai ham bhī haiñ ḳhush-mizāj
ab kyā batā.eñ kaise hamārī nahīñ banī

dil ne chupke se kahā koshish-e-nākām ke baad
zahr hī dard-e-mohabbat kī davā ho jaise

dil-girafta hī sahī bazm sajā lī jaa.e
yād-e-jānāñ se koī shaam na ḳhālī jaa.e

dil hī nahīñ hai us ke tasavvur meñ shād-kām
ik sarḳhushī meñ jhūmtā hai añg añg bhī

yaad karne kā tumheñ koī irāda bhī na thā
aur tumheñ dil se bhulā deñ ye gavārā bhī na thā

ho ga.ī ḳhatm sarāboñ meñ bhaTaktī huī ziist
dil meñ hasrat hī rahī dasht meñ dariyā bhī na thā

kis ḳhamoshī se jalā dāman-e-dil ai 'gulnār'
koī shola bhī na thā koī sharārā bhī na thā

ik dhaḌakte dil se maiñ ne ḳhud ko patthar kar liyā
ab butoñ ke saath hī bas rakhne vaalā hai mujhe