Tags-Dil

sargarm-e-tamāsha thā dil mahv-e-adā barsoñ
samjhā hī nahīñ nādāñ mafhūm-e-vafā barsoñ

ik baar guzartā hai dil dard kī rāhoñ se
rag rag se taḌaptī hai tāsīr-e-duā barsoñ

bhalā batāo to ḳhalq kyuuñ kar do rasta rakkheñ na haat dil par
laḌātā hai añkhḌiyāñ vo naT-khaT kabhī idhar ko kabhī udhar ko

ye kah do āshiq kā us sanam se dil-o-jigar ab ḳharāsh-e-ġham se
gire hai ashkoñ ke saath kaT kaT kabhī idhar ko kabhī udhar ko

agar vo husn-e-dil-ārā kabhī ho jalva farosh
faroġh-e-nūr meñ gum zarf-e-bām ho jaa.e

dil ke be-tartīb vīrāne ko ghar us ne kiyā
phir nizām-e-zindagī zer-o-zabar us ne kiyā

haath aa.egā kyā sāhil-e-lab se hameñ 'anjum'
jab dil kā samundar hī guhar-bār nahīñ hai

kisī kā ġham ho mire dil pe baar hotā hai
usī kā naam ġham-e-rozgār hotā hai

ajiib kashmakash-e-bahr-e-ġham meñ dil hai 'qamar'
na Dūbtā hai ye beḌā na paar hotā hai

chhoḌ aanā vahīñ par zarā āvāra-mizājī
sahrā kī taraf ai dil-e-nādān agar jā

jab zehn ko sunñī hī nahīñ baat tumhārī
dil tū bhī rusūmāt-e-tāhum se mukar jā

muñh zard o āh-e-sard o lab-e-ḳhushk o chashm-e-tar
sachchī jo dil-lagī hai to kyā kyā gavāh hai

tire lahje kī shabnam jazb kar de kuchh namī is meñ
agarche dil sulagtī ret kā ambār hai phir bhī

dil-e-hazīñ ko mire jalva-zār hone do
ḳhizāñ-nasīb chaman meñ bahār hone do

dil-e-firāq-zada meñ qarār hone do
dam-e-ajal to nigāhoñ ko chaar hone do

mire jahān-e-mohabbat meñ paḌ ga.ī halchal
sukūn-e-dil ne mujhe aur be-qarār kiyā

bol ai taa.ib miTā naqsh-e-suvaidā kis tarah
lauh-e-dil par lafz-e-haq marqūm kaise ho gayā

jin ke hone se ham bhī haiñ ai dil
shahr meñ haiñ vo sūrateñ baaqī

dil nādāñ hai shāyad raah pe aa jaa.e
tum bhī samjhāo ham bhī samjhāte haiñ

dil se dil baat kare aañkh se aañkh
āshiqī kā jo tavassul Thahre