Tags-Dil

tere hī dil kā agar gosha qafas hai sayyād
phir to hargiz mujhe is qaid se āzād na kar

dil hai nisār mardumak-e-chashm-e-dost par
bīmār ko hai mardum-e-bīmār se ġharaz

ham dil-e-zohra-vashāñ meñ ḳhāliq-e-andesh haiñ
go ḳharābātī sahī jibrīl ke ham-pesha haiñ

ḳhāna-e-dil meñ vo rahtā kab kisī ke saath hai
jalvagar hotā hai vo jab mehmāñ koī na ho

dil ko maiñ muntazir-e-abr-e-karam kyuuñ rakkhūñ
phuul hai qatra-e-shabnam se bahal jā.egā

'rabāb' koī dilāsa na hausla maujūd
zabān qufl-shuda dil dayār chup ḳhāmosh

gar yaad meñ saaqī kī sāġhar nazar aa jaa.e
paimāna-e-dil chhalke muñh ko jigar aa jaa.e

aks-e-ruḳh saaqī ko gar dekh luuñ sāġhar meñ
kuchh dil ke bahalne kī sūrat nazar aa jaa.e

behtar hai ḳham-o-sāġhar āñkhoñ se raheñ ojhal
aisā na ho shīshe par dil TuuT kar aa jaa.e

ba-gard-e-kārvāñ dil juuñ jaras hai na.ara-zan kis kā
azīzo kam huā hai yūsuf-e-gul-pairahan kis kā

ai dil-e-nādāñ kisī kā rūThnā mat yaad kar
aan Tapkegā koī aañsū bhī is jhagḌe ke biich

mujh se kahā jibrīl-e-junūñ ne ye bhī vahi-e-ilāhī hai
maz.hab to bas mazhab-e-dil hai baaqī sab gumrāhī hai

zikr mirā aur tere lab par yaad mirī aur tere dil meñ
jhūTī aas dilāne vaale aag na bhaḌkā mere dil meñ

mujh se āñkheñ pher ke tū ne ye mushkil bhī āsāñ kar dī
varna tere ġham ke badle letā kaun basere dil meñ

pyār-bharī ummīdoñ par aġhyār kī vo zar-posh nigāheñ
kāñToñ ke paivand lagā kar tū ne phuul bikhere dil meñ

pūchh rahī hai duniyā mujh se vo harjā.ī chāñd kahāñ hai
dil kahtā hai ġhair ke bas meñ maiñ kahtā huuñ mere dil meñ

kaash kabhī saffāk zamāna merā siina chiir ke dekhe
chain ke badle dard ne ab to Daal diye haiñ Dere dil meñ

Darte Darte soch rahā huuñ vo mere haiñ ab bhī shāyad
varna kaun kiyā kartā hai yuuñ pheroñ par phere dil meñ

pyaar kī pahlī manzil par anjān musāfir dekh rahā hai
āñkhoñ meñ sañgīn ujāle aur sayyāl añdhere dil meñ

ujḌī yaado TuuTe sapno shāyad kuchh mālūm ho tum ko
kaun uThātā hai rah rah kar Tīseñ shām-savere dil meñ