Tags-Dil

ik gosha-e-dil meñ jo kisī ke haiñ makīñ ham
ye zo.am hai goyā ki haiñ vālī-e-zamīñ ham

uff ik dil-e-'rahbar' pe hasīnoñ kī ye takrār
lalchāeñ hamīñ ham ise pā jaa.eñ hamīñ ham

pareshāñ huuñ tirā chehra bhulāyā bhī nahīñ jaatā
kisī se hāl-e-dil apnā sunāyā bhī nahīñ jaatā

zabāñ ḳhāmosh rahtī hai par āñkheñ bol detī haiñ
in āñkhoñ se to rāz-e-dil chhupāyā bhī nahīñ jaatā

sabhī 'imrran' kī sūrat nahīñ hote haiñ duniyā meñ
har ik insān ko dil meñ basāyā bhī nahīñ jaatā

tire vatan ko tirī arz-e-bā-hamīyyat ko
dhaḌakte khaulte hindostāñ ke dil kā salām

āḳhir āḳhir hosh hī vahshat bhī thā hairat bhī thā
dil ko ālam-āfrīñ sahrā-bad-amāñ dekh kar

sheva apnā ġham-parastī qibla apnā ḳhāk-e-dil
rūh-e-ġham ko paikar-e-ḳhākī meñ insāñ dekh kar

har tasallī se sivā hotī ga.ī dil kī taḌap
dard kuchh se kuchh huā sāmān-e-darmāñ dekh kar

vīrāna bhī ham the ḳhāmoshī bhī ham the dil bhī ham
yaksūī se ishq kiyā aur yaktā.ī se ḳhatm hue

shāḳh-e-ummīd jal ga.ī hogī
dil kī hālat sambhal ga.ī hogī

us ne māyūs kar diyā hogā
phāñs dil se nikal ga.ī hogī

ab to dil hī badal gayā ab to
saarī duniyā badal ga.ī hogī

dil galī meñ raqīb dil kā julūs
vaañ to talvār chal ga.ī hogī

ghar se jis roz maiñ chalā hūñgā
dil kī dillī machal ga.ī hogī

ye merā dil hai mirā ā.īna hai shahzādī
aur ā.īne meñ giraftār ik samundar hai

sunte haiñ vo shaḳhs to ghar hī badal gayā
phir ye dil-āvez ishāre kis ke haiñ

zarf-e-dil soz-e-darūñ dīda-e-bīnā māñge
ye jo mil jaa.eñ to phir dāvat-e-jalva māñge

kis kaam kī aisī sachchā.ī jo toḌ de ummīdeñ dil kī
thoḌī sī tasallī ho to ga.ī maanā ki vo bol ke jhuuT gayā

bujh ga.e kyā charāġh sab ai dil-e-āfiyat-talab
kab se bhaTak rahe haiñ ham kū-e-ziyāñ ke ās-pās