Tags-Dil

vo le gayā saath apne ujāle mire dil ke
kaaTe na kaTī ham se jo thī dard-bharī raat

ai shauq patā kuchh tū hī batā ab tak ye karishma kuchh na khulā
ham meñ hai dil-e-betāb nihāñ yā aap dil-e-betāb haiñ ham

yuuñ achānak na zulfeñ bikherā karo
dil to nādān hai bahak bhī saktā hai

dil kī ujḌī huī hālat pe na jaa.e koī
shahr ābād hue haiñ isī vīrāne se

dil meñ hai mulāqāt kī ḳhvāhish kī dabī aag
mehñdī lage hāthoñ ko chhupā kar kahāñ rakkhūñ

jo shaḳhs ki hai ḳhvāb meñ aane se bhī ḳhā.if
ā.īna-dil meñ use maujūd hī dekhūñ

apne dil kī saltanat ke raaz kholuñgī kabhī
istife kitne likhe haiñ nā-gahānī chaah par

ḳhvāb bhī bosīdgī le kar gadāgar ban ga.e
aur fatve de rahe haiñ ab dil-e-gumrāh par

dard-mandī kā hunar bhī jis ke hāthoñ meñ nahīñ
ham ne dil ko vaar Daalā hai usī dargāh par

zabt-e-āh-e-dil-shikan aur maiñ hazīñ
kar rahā huuñ ehtirām-e-ārzū

ahl-e-dil zinda haiñ kis ummīd par
nazm-e-duniyā hai nizām-e-ārzū

yaas kī gunjā.isheñ kis dil meñ haiñ
le rahā hai kaun nām-e-ārzū

dil ko taufīq-e-ziyāñ ho to ġhazal hotī hai
zahr-e-ġham bāda-chukāñ ho to ġhazal hotī hai

dhaḌkaneñ sūrat-e-alfāz bikhartī jaa.eñ
dil ma.ānī kī zabāñ ho to ġhazal hotī hai

rauzan-e-māh se pichhle pahar ik shoḳh-laqā
jānib-e-di-nigarāñ ho to ġhazal hotī hai

vo dil kī sej pe ai 'hādia' biThā.egā
sajā hai ḳhvāb meñ kamra koī havelī kā

zarre zarre meñ mahak pyaar kī Daalī jaa.e
bū ta.assub kī har ik dil se nikālī jaa.e

jab vo aate haiñ zindagī ke qarīb
dil bhī dūr-ūftāda hotā hai

ḳhirad ko ḳhāna-e-dil kā nigah-bāñ kar diyā ham ne
ye ghar ābād hotā is ko vīrāñ kar diyā ham ne

khañDar meñ māh-e-kāmil kā sañvarnā is ko kahte haiñ
tum utre dil meñ jab dil ko bayābāñ kar diyā ham ne