Tags-Dil

dushman kī baat jab tirī mahfil meñ rah ga.ī
ummīd yaas ban ke mire dil meñ rah ga.ī

tū ham se chhap gayā to tirī shakl-e-dil-fareb
tasvīr ban ke ā.īna-e-dil meñ rah ga.ī

niklā vahāñ se maiñ to mire dil kī aarzū
sar pīTtī huī tirī mahfil meñ rah ga.ī

maiñ kyā kahūñ 'rasā' ki mire dil pe kyā banī
talvār khich ke jab kaf-e-qātil meñ rah ga.ī

kal na ho ye ki makīnoñ ko taras jaa.e ye dil
dil ke aaseb kā har ek se charchā na karo

baat us kī dil meñ mere utartī chalī ga.ī
vo ajnabī thā aur mirā mehmān bhī na thā

ab bhī tauhīn-e-itā.at nahīñ hogī ham se
dil nahīñ hogā to bai.at nahīñ hogī ham se

machine ban to chukā huuñ magar nahīñ bhūlā
ki mere jism meñ dil bhī kabhī dhaḌaktā thā

ik tabassum pe Talegī har baat
daaġh dilkash ko dikhāne nikle

zabān pe nāla-o-fariyād ke sivā kyā hai
hamāre dil meñ tirī yaad ke sivā kyā hai

udhar to rañg hai mastī hai shādmānī hai
idhar bas ik dil-e-nāshād ke sivā kyā hai

tirī havas meñ jo dil se pūchhā nikal ke ghar se kidhar ko chaliye
taḌap ke bolā jidhar vo nikle shitāb usī rahguzar ko chaliye

azal se us kā hī aasrā hai jo dene vaalā murādoñ kā hai
barā.e-fil-faur umīd-e-dil ko jo chūmne us ke dar ko chaliye

ajiib mushkil hai aah ai dil kaThin hai bīm-o-rajā kī manzil
qadam qadam par ye sochte haiñ kidhar na chaliye kidhar ko chaliye

tirī judā.ī meñ jān-e-ālam kiyā hai donoñ ko ġham ne be-dam
banā.iye jā ke dil kī turbat ki dafn karne jigar ko chaliye

charāġh-e-bazm-e-ḳhudā huā hai ḳhudā ne mahbūb use kahā hai
ye shaam se lau lagī hai dil ko ki dekhne us bashar ko chaliye

tujhe kahtā huuñ sun o vahshat-e-dil
vahāñ le chal jahāñ vo dil-sitāñ hai

ik umr dil kī ghaat se tujh par nigāh kī
tujh par tirī nigāh se chhup kar nigāh kī

jab bhī ġham-e-zamāna se āñkheñ huiiñ do-chār
muñh pher kar tabassum-e-dil par nigāh kī

thā ishq kā havāla nayā ham ne is liye
mazmūn-e-dil ko phir se tab.a-zād kar liyā