Tags-Dil

añdhere dil kī bastī ke bhī shāyad duur ho jaa.eñ
maiñ tere naam kī mash.al jalā kar dekh letā huuñ

dīda-e-dil ko yuuñ nazar aayā
ek dhundlī sī yaad kā chehra

jin par tumhāre aane se khilte rahe gulāb
ab dil meñ aisī rāhguzar tak nahīñ rahī

gul-o-saman kī tarah dil meñ hañs rahe haiñ ham
ye aur baat ba-zāhir bujhe bujhe haiñ ham

nigāh-o-ruḳh par hai likhī jaatī jo baat lab par rukī huī hai
mahak chhupe bhī to kaise dil meñ kalī jo ġham kī khilī huī hai

jo dil se lipTā hai saañp ban kar Darā rahā hai bachā rahā hai
ye saarī raunaq us ik tasavvur ke dam se hī to lagī huī hai

paḌe haiñ ham ḳhūn-e-dil meñ ġhaltāñ jigar hai dāġh-e-jafā se sozāñ
koī hai apne ta.iiñ sambhāle ze-āb avval do.am ba-ātish

hastī kī matā-e-be-pāyāñ jāgīr tirī hai na merī hai
is bazm meñ apnī mish.al-e-dil bismil hai to kyā raḳhshāñ hai to kyā

ye haath salāmat haiñ jab tak is ḳhuuñ meñ harārat hai jab tak
is dil meñ sadāqat hai jab tak is nutq meñ tāqat hai jab tak

mirā jaal ḳhālī
magar dil masarrat ke ehsās se bhar gayā

jehd-o-īsār se raushan hai vafā kī qindīl
dil-girafta haram-e-pāk kā me.amār sahī

rāhbar jazba-e-sādiq dil-e-ma.asūm kā hai
har nafas ziist kā ik manzil-e-dushvār sahī

chāhā thā mafar dil ne magar zulf-e-girah-gīr
pechāk banātī rahī pechāk se bāhar

jī jis ko chāhtā thā usī se milā diyā
dil kī kashish ne kī ye karāmāt raah meñ

us ko rahne do mire zaḳhmoñ kā marham ban kar
ḳhūn-e-dil ko jo mire rañg-e-hinā jaane hai

pūchhā ki vaj.h-e-zindagī bole ki dildārī mirī
pūchhā ki marne kā sabab bole jafā-kārī mirī

pūchhā ki dil ko kyā kahūñ bole ki dīvāna mirā
pūchhā ki us ko kyā huā bole ki bīmārī mirī

pūchhā satā ke rañj kyuuñ bole ki pachhtānā paḌā
pūchhā ki rusvā kaun hai bole dil-āzārī mirī

pūchhā ki dozaḳh kī jalan bole ki soz-e-dil tirā
pūchhā ki jannat kī phaban bole tarah-dārī mirī

pūchhā ki 'muztar' kyuuñ kiyā bole ki dil chāhā mirā
pūchhā tasallī kaun de bole ki ġham-ḳhvārī mirī