Tags-Dil

machalnā ai dil burā nahīñ hai to zid bhī karnā durust kab hai
kisī kī āñkheñ nahīñ khilaunā jo koī tujh ko ḳharīd kar de

aañkh to sirf shahādat degī
dil ko tasdīq-e-sahar karnā hai

nikaltī hī nahīñ dil se kabhī yādeñ mohabbat kī
sitam us dil pe apne roz-o-shab hotā hī rahtā hai

'josh' dhundlātā na hargiz ye mirā shīsha-e-dil
gard us kī vo agar roz utārā karte

jaane vo kaun hai jo dāman-e-dil khīñchtā hai
jab kabhī ham ne irāda kiyā mar jaane kā

sochte hī rahe pūchheñge tirī āñkhoñ se
kis se sīkhā hai hunar dil meñ utar jaane kā

ḳhalish ke saath is dil se na merī jaañ nikal jaa.e
khiñche tīr-e-shanāsā.ī magar āhista āhista

jo dil hai vo labrez-e-tamannā hai 'mubārak'
is jaam se achchhā to koī jaam nahīñ hai

duniyā-o-dīn dīda-e-dil sabr aur qarār
tū hī agar nahīñ to ik aalam ye sab nahīñ

kuchh aisī suhūlat se makīñ dil meñ huā vo
mujh ko bhī mirī zaat se jaanā nahīñ paḌtā

sab ko miT jaanā hai taqvīm-e-fanā kyā dekhūñ
zindagī kyuuñ na tirā husn-e-dil-ārā dekhūñ

dil-e-pur-ḳhūñ ko to mil jaa.e farāġh-e-ishrat
kab talak dard se us kā maiñ taḌaptā dekhūñ

kyā bujhā.egā mire dil kī lagī vo shola-rū
dauḌtā hai jo lagā ke aag paanī ke liye

ik ḳhānumāñ-ḳharāb kī daulat kaheñ jise
vo dard dil meñ hai ki mohabbat kaheñ jise

baaqī kahāñ se 'rāz' zamāne meñ āj-kal
vo husn-e-dil-navāz mohabbat kaheñ jise

vo jis ne dekhā nahīñ ishq kā kabhī maktab
maiñ us ke haath meñ dil kī kitāb kyā detā

phirtī thī le ke shorish-e-dil kū-ba-kū hameñ
manzil milī to shorish-e-dil kā patā na thā

dil-e-marhūm kī mayyat ijāzat do to rakh deñ ham
tire talve-barābar hī zamīñ kaafī hai madfan ko

ijāzat do to saarī anjuman ke dil hilā duuñ maiñ
samajh rakkhā hai tum ne hech tāsīrāt-e-shevan ko

dil ke har dard ne ash.ār meñ Dhalnā chāhā
apnā pairāhan-e-be-rañg badalnā chāhā