Tags-Dil

āñkheñ jalne lagīñ tapte hue bāzāroñ meñ
dil ne jab bhī kisī manzar pe machalnā chāhā

hai kaun sī vo chashm nahīñ jis meñ us kā nuur
hai kaun sā vo dil ki nahīñ jis meñ us kī jā

sab kā isī dukān se jaarī hai kārobār
letā hai koī husn koī dil hai bechtā

dil se kartā huuñ laakh laakh savāl
yaad aatā hai jab javāb tirā

ishrat-e-dil thī dil kī barbādī
TuuT kar ban gayā rabāb tirā

dil ġhanī chāhiye go huuñ maiñ faqīr ai 'ātish'
sher kī khaal hī hai qāqum-o-sanjāb mujhe

apne dil-e-betāb se maiñ ḳhud huuñ pareshāñ
kyā duuñ tumheñ ilzām maiñ kuchh soch rahā huuñ

tāzīm ko uThte haiñ is vāste dil vaale
hazrat ne mashīḳhat kī ik tarah nikālī hai

dil sarāpā dard thā vo ibtidā-e-ishq thī
intihā ye hai ki 'fānī' dard ab dil ho gayā

chhoTī sī umr meñ haiñ vo dilbar to aib kyā
sin kī kamī nikal ga.ī zulf-e-darāz se

kahte haiñ gino mujh pe jo dil aa.e hue haiñ
kuchh chhīne hue haiñ mire kuchh paa.e hue haiñ

ab to soch liyā hai yaaro dil kā ḳhuuñ ho jaane duuñ
jin logoñ ne dard diyā hai maiñ un ko afsāne duuñ

dil shīsha-e-sā.at apnā ban jaa.e
saaqī na kare jo do ghaḌī baat

nahīñ hai parvā-e-māl-o-daulat safā-e-bātin se dil ġhanī hai
gadā haiñ hājat-ravā-e-sultāñ ye kīmiyā-e-farotanī hai

hameñ na raas aayā dil lagānā ġhazab huā phir gayā zamāna
koī to kahtā hai qaid kar do koī ye kahtā hai kushtanī hai

raqīb ko paas gar biThāyā to mujh se hargiz na zabt hogā
miTā hī duuñ ek din ye jhagḌā bas ab to dil meñ yahī Thanī hai

koī kisī se na dil lagā.e na sar pe koh-e-alam uThā.e
nahīñ bharosa ḳhudā bachā.e ki ishq meñ jaan par banī hai

khapī hai dil meñ hañsī tumhārī firāq meñ kauñdtī hai bijlī
raheñ na kyuuñ ashk-e-surḳh jaarī jigar meñ almās kī kanī hai

jigar meñ barsoñ khaTak rahegī phuñkeñge pahlū chamak rahegī
ḳhayāl-e-mizhgān-e-yār-e-jānī sinān-e-dil-doz kī anī hai

bichhaḌ gayā hai to ye kah ke dil ko bahlāūñ
vajūd us kā mire haq meñ nek-fāl na thā