Tags-Dil

ilm hāsil kar faqat tadbīr-e-manzil ke liye
vo dimāġhoñ ke liye haiñ aur tū dil ke liye!

kyā bharosa kisī pe ho ai 'josh'
dil ko ik dil-navāz ne maarā

vo de rahā thā talab se sivā sabhī ko 'ḳhayāl'
so maiñ ne dāman-e-dil aur kuchh kushāda kiyā

asl hālat kā bayāñ zāhir ke sāñchoñ meñ nahīñ
baat jo dil meñ hai mere mere lafzoñ meñ nahīñ

vo jis jagah bhī hai merā hai bas vo merā hai
ye mere dil meñ ḳhudāyā qayās rahne de

ḳhizān-e-hijr meñ gulshan meñ phuul khilne lage
gazand ye bhī dil-e-nā-tavāñ pe pahuñchā hai

na kuchh rahā hai ki ham hī rakhte na kuchh bachā hai ki tum ko dete
matā-e-dil thī luTā ke aa.e jo qarz-e-jāñ thā chukā diyā hai

is Dūbte sūraj se to ummīd hī kyā thī
hañs hañs ke sitāroñ ne bhī dil toḌ diyā hai

tū mere dil meñ misāl-e-chaman mahaktā hai
maiñ saañs luuñ tirī ḳhushbū bikhar bikhar jaa.e

mire hī sāmne aa.ī hai aur sūrat meñ
nigāh tund ġhazabnāk dil kalām durusht

roz khaTkā sā dil meñ rahtā hai
dekhiye kyā vo hukm aaj kareñ

ab terī ināyat ho ki duniyā kī navāzish
dil ho to gayā vaise ye vīrān mirī jaañ

dil chāhtā ye hai ki tujhe duur se dekhūñ
lekin jo taqāze kā hai tūfān mirī jaañ

paanī se sag-gazīda Dare jis tarah 'asad'
Dartā huuñ aa.ine se ki mardum-gazīda huuñ

ai mire lāDle ai naaz ke paale hue dil
tū ne kis kū-e-malāmat se guzārā hai mujhe

qadam rakhe mire siine pe aa ke gar vo nigār
hinā kā kaam maiñ ḳhūn-e-dil-fiġhār se luuñ

jo mai-kashī kā irāda ho kuchh tire dil meñ
chaman meñ sāġhar-e-gul dast-e-shāḳh-sār se luuñ

kabhī sairāb jo lamhe kiye the ḳhūn-e-dil se
vahī lamhe 'razī' āñkhoñ meñ kāñTe bo ga.e haiñ

yuuñ tasallī de rahe haiñ ham dil-e-bīmār ko
jis tarah thāme koī girtī huī dīvār ko

maslahat aql se kahtī hai ki ik had meñ raho
aur dil ko bhī sharārat nahīñ karne detī