shamīm-e-zulf-e-muambar jo rū-e-yār se luuñ
to phir ḳhatā hai mirī mushk gar tatār se luuñ
qadam rakhe mire siine pe aa ke gar vo nigār
hinā kā kaam maiñ ḳhūn-e-dil-fiġhār se luuñ
agar mile tire hāthoñ se ai junūñ fursat
qisās-e-ābla-pā.ī maiñ nok-e-ḳhār se luuñ
mire huzūr ye loTe hai terī chhātī par
jo pahuñche haath to badlā guloñ ke haar se luuñ
dilā baje kahīñ ghaḌiyāl tā maiñ ghaḌiyoñ kā
hisāb us shab-e-hijr-e-siyāhkār se luuñ
ajab hai sair kisī din to saath baaġh meñ chal
kahāñ talak maiñ qadam ijz-o-inkisār se luuñ
paTā-paTī kā mire paas gar na ho ḳhema
to yaar tere liye abr-e-nau bahār se luuñ
jo mai-kashī kā irāda ho kuchh tire dil meñ
chaman meñ sāġhar-e-gul dast-e-shāḳh-sār se luuñ
agar surāhi-e-ġhuncha meñ ho na bāda-e-surḳh
to shīsha-e-mai-e-ḳhas sarv-e-jūī-bār se luuñ
na hove mutrib-e-naġhma-sarā to is kā kaam
qasam hai mujh ko tirī andalīb-e-zār se luuñ
lage na haath koī gar rabāb-o-chañg-navāz
to apne dosh pe rakh biin ko maiñ taar se luuñ
ye jī meñ ho ki na dekhe koī to parde ko
kanār-e-āb-e-ravāñ chādar ābshār se luuñ
balā.eñ lene se mere agar ḳhushī ho tirī
balā.eñ mehr se iḳhlās se pyaar se luuñ
gar us pe bhī gul-e-āriz kā tū na de bosa
to phir maiñ jabr karūñ apne iḳhtiyār se luuñ
'nasīr' madarsa-e-ishq meñ mutavval kā
sabaq na kyūñki maiñ zulf-e-darāz-e-yār se luuñ