Tags-Dil

bahut dinoñ se dil-o-jāñ kī mahfileñ haiñ udaas
koī tarāna koī dāstāñ sunātā jā

ab un se hāl-e-dil maiñ bayāñ 'soz' kyā karūñ
apnī zabān par bhī to qudrat nahīñ mujhe

tumhārī yaad ko kab tak sajā ke rakhtā maiñ
kabhī to ḳhālī ye dil kā makān honā thā

nāseh tujhe aate nahīñ ādāb-e-nasīhat
har lafz tirā dil meñ chubhan chhoḌ rahā hai

paḌī thī dil kī zamīñ jaane kab se be-masraf
ab us meñ yādoñ ke but īstāda karte haiñ

mujh dil meñ hai jo but kī parastish kī aarzū
dekhī nahīñ vo aaj talak barhaman ke biich

dhuāñ uThtā hai yādoñ kā sulagte dil ke pahlū se
kisī kī surmagīñ āñkhoñ kā kājal phail jaatā hai

maiñ ne kabhī kisī kā dukhāyā nahīñ hai dil
mujh ko kabhī kisī se nadāmat huī nahīñ

karte ho pasand vahshat-e-dil
le jāoge kyā hiran kisī kā

siine se hamārā dil na le jaao
chhuḌvāte ho kyuuñ vatan kisī kā

ishq hai ġham jo sikhātā hai fanā ho jaanā
dard-e-dil hai jise aatā hai davā ho jaanā

saañs gintā huuñ tamannā meñ ki dekhūñ 'mānī'
ġham-e-dil kā adab-āmoz-e-fanā ho jaanā

ham shauq kā naama likhte haiñ ki sabr ai dil kyuuñ rotā hai
ye kyā tarkīb hai ai zālim ham likhte haiñ tū dhotā hai

hai dil ik mard-e-āḳhir-bīñ apne āmāl par rotā hai
gar Duub ke dekho ashk nahīñ motī se kuchh ye pirotā hai

ghar is se ishq kā bantā hai dil saḳhtī se kyuuñ ghabrā.e
shīrīñ ye mahal uThvātī hai farhād ye patthar Dhotā hai

le de ke saare aalam meñ hamdard jo pūchho ik dil hai
maiñ dil ke haal pe rotā huuñ dil mere haal pe rotā hai

vo umañg kahāñ vo shabāb kahāñ hue donoñ nazr-e-ishq-mizha
pūchho mat aalam dil kā mire nishtar sā koī chubhotā hai

vo sāneha huā thā ki bas dil dahal ga.e!
ik shab meñ saare shahr ke chehre badal ga.e

lau sham.a kī bujhne ko hai ai gul
mahfil meñ na koī dil jalā ho

dil kā dukhnā usī se kahiye
jo dard kī qadr jāntā ho