Tags-Dil

bikhrā bikhrā sā sāz-o-sāmāñ hai
ham kahīñ dil kahīñ aqīda kahīñ

ho gayā jis din se apne dil par us ko iḳhtiyār
iḳhtiyār apnā gayā be-iḳhtiyārī rah ga.ī

josh ubaltā hai pighaltī hai tamannā dil meñ
aag hī aag hai is soz-sarāpā dil meñ

terā jalva hai ki rañgīn sā dhokā dil meñ
kabhī zulmat kabhī paidā hai ujālā dil meñ

ab nahīñ tere do-ālam kī zarūrat mujh ko
ishq ne tere basā dī na.ī duniyā dil meñ

apnī āñkheñ to uThā mahv-shuda jalve bhī
nazar ā.eñge tujhe anjuman-ārā dil meñ

naaz thā un ko ki har qaid se āzād haiñ vo
maiñ ne kar hī liyā pāband-e-tamannā dil meñ

phūñktā rahtā hai kaunain ko jin kā partav
be-zarar hai unhīñ jalvoñ kā tamāshā dil meñ

aap hī baada huuñ maiñ aap hī saaqī 'maḳhmūr'
sāġhar āñkhoñ meñ mirī aur hai miinā dil meñ

us shola-ḳhū se kasb-e-harārat kare hai daaġh
zarra hai jis kā soz-e-dil-e-āftāb meñ

hamdard nahīñ hamrāz nahīñ kis se kahiye kyuuñ kar kahiye
jo dil pe guzartī rahtī hai jo jaan pe sadme sahte haiñ

'akbar' shāyad dil kho baiThe vo jalse vo ahbāb nahīñ
tanhā ḳhāmosh se phirte haiñ har vaqt udaas se rahte haiñ

rañj kī ik be-mausam Tahnī dil se yuuñ paivasta hai
puurī shāḳh harī ho jaa.e ek sirā chhū lene meñ

dil ko taskīn-e-yār le Duubī
is chaman ko bahār le Duubī

kabhī mire dil se kartī haiñ bal kahī haiñ shāne se ye uljhtīñ
ġharaz ki zulfoñ ko tū ne zālim bigāḌā hai sar chaḌhā chaḌhā kar

shikast likhtā thā naam dil kā yahī thī tiflī meñ mashq terī
banā diyā dil-shikan ye tujh ko moallimoñ ne likhā likhā kar

dikhā ke gul se ezaar tū ne kiyā dil-e-āshiqāñ ko bulbul
banā diye gosh ġhairat-e-gul sadā-e-rañgīñ sunā sunā kar

rulā.e barsoñ hañsī tū jis se dikhā.e gar zulf maar rakkhe
kare tū dar-parda raah dil meñ jo dekhe parda uThā uThā kar

udhar mizha ne lagā.ī barchhī idhar nigāhoñ ne tiir maare
shikast dī fauj-e-sabr-e-dil ko ye kis ne āñkheñ laḌā laḌā kar

chāragar ab mujh se merī lazzat-e-īzā na pūchh
ḳhanda-zan hote haiñ zaḳhm-e-dil namakdāñ dekh kar