Tags-Dil

vo aur pursish-e-ahl-e-vafā fareb na khā
dil aur tark-e-ġham-e-yār e'tibār na kar

ye sochtā huuñ kisī dil meñ ghar karūñ maiñ bhī
aur us se pahle yahāñ be-Thikāna ho jā.ūñ

har ghaḌī dil meñ yaad hai un kī
bas usī naam se mohabbat hai

pursish tirī fareb tasallī tirī fareb
vo dil kī baat thī jise duniyā kā Dar kahā

vo jo ik Tiis sī hai dil meñ mire
rah ke be-iḳhtiyār phir chamkī

kuchh is tarah se terā ġham diye jalātā thā
ki ḳhāk-e-dil kā har ik zarra jagmagātā thā

chhup kar royā jā saktā hai
dil bahlāyā jā saktā hai

khīñch saktā huuñ ġham-e-dil kā surūr
itnā sāmān salāmat hai abhī

gudāz-e-dil se bātin kā tajallī-zār ho jaanā
mohabbat asl meñ hai ruuh kā bedār ho jaanā

naved-e-aish se ai dil zarā hushyār ho jaanā
kisī taaza musībat ke liye tayyār ho jaanā

vo un ke dil meñ shauq-e-ḳhud-numā.ī kā ḳhayāl aanā
vo har shai kā tabassum ke liye tayyār ho jaanā

sahar kā is tarah añgḌā.ī lenā dil-farebī se
udhar shā.ir ke mahsūsāt kā bedār ho jaanā

tavassul se tire dil meñ bharūñgā quvvateñ barqī
zarā merī taraf bhī ai nigāh-e-yār ho jaanā

baiThe-biThā.e kūcha-e-qātil meñ le gayā
ma.asūm dil bhī kitnā sitamgar lagā mujhe

kis kis ne chuTkiyoñ meñ uḌāyā hai merā dil
chāhe to tū bhī āḳhirī Thokar lagā mujhe

yā mere dil se hasrat-e-parvāz chhīn le
yā mere paas aa ke na.e par lagā mujhe

ab ishq aur dasht ḳhasāre meñ haiñ miyāñ
ab dil kā kārobār nahīñ kar rahe haiñ log

dil-e-āzāda-rau meñ vo tamannā thī bayābāñ kī
qadam rakhte hī shaq hone lagī dīvār zindāñ kī

hamārī zindagī kyā silsila ik dil dhaḌakne kā
hamārī maut kyā jumbish hai ik jazbāt-e-pinhāñ kī

maan liyā dil bas meñ nahīñ hai phir bhī jiinā to hogā hī
yā ab apnā tan bisrā duuñ yā phir aur koī tan DhūñDūñ