Tags-Aashiq

ḳhūn-e-dil-e-āshiq ke us qatre kā kyā kahnā
duniyā-e-vafā jis ne rañgīn banā Daalī

natīja kuchh nahīñ hai sham.a ke aañsū bahāne se
ye sarf-e-be-mahal āshiq kā āḳhir ḳhūñ-bahā kyuuñ ho

jo ki terā āshiq hai us kā ai gul-e-ra.anā
rañg-e-zāfrānī hai ashk-e-arġhavānī hai

teġh o kamand maañg kar abrū o zulf se
āshiq bahut hue haiñ jafā-kār maar Daal

āshiq jo terī zulf kā ho us ko tū sanam
le jā ke tīra-shab pas-e-dīvār maar Daal

ba-rañg us ke nahīñ mahbūb dil rone ko āshiq ke
sa.ādat ḳhaañ hai laḌkā vaz.a kar letā hai barsātī

girdāb-e-balā meñ dil-e-āshiq ko phañsāyā
baalī ne tirī zulf-e-pareshāñ se ulajh kar

āshiq kaheñ jo hoge to jānoge qadr-e-'mīr'
ab to kisī ke chāhne kā tum ko chaav hai

dekhī hai bahut aap ne ā.īne kī hairat
āshiq kā magar dīda-e-hairāñ nahīñ dekhā

ye naqsh diloñ par se jaane kā nahīñ us ko
āshiq ke huqūq aa kar nāhaq bhī miTā jaanā

āshiq haiñ ham to 'mīr' ke bhī zabt-e-ishq ke
dil jal gayā thā aur nafas lab pe sard thā

ho ga.e maġhrūr mujh ko āshiq apnā jaan kar
haa.e is dil kā burā ho aah ne dhokā diyā

āshiq bhī nahīñ sādhū bhī nahīñ phir raaz hai kyā ye 'mirzā'-jī
kis aañch se dahkā hai siina kyā aag jalā.e rakhte haiñ

apnī zabāñ se kuchh na kaheñge chup hī raheñge āshiq log
tum se to itnā ho saktā hai pūchho haal bechāroñ kā

maiñ vo āshiq huuñ ki ḳhud hī chūmtā huuñ apne haath
kab bhalā fursat milī apnī raqābat se mujhe

hai hasti-e-āshiq kā bas itnā hī fasāna
barbād thī barbād hai barbād rahegī

agar tasvīr-e-rañg-e-zard-e-āshiq ḳhūb-rū dekheñ
koī batlā.egā suunā ghar kā koī kuunā hai

are o ḳhāna-ābād itnī ḳhūñ-rezī ye qattālī
ki ek āshiq nahīñ kūcha tirā vīrān suunā hai

āshiq kā bāñkpan na gayā bād-e-marg bhī
taḳhte pe ġhusl ke jo liTāyā akaḌ gayā

lagā hai aap siiñ ai jaañ tire āshiq kā dil rah rah
kare hai mast kuuñ be-ḳhud sharāb āhista āhista