Tags-Aashiq

āshiq banā ke ham ko jalāte haiñ sham.a-rū
parvāna chāhiye unheñ parvāna chāhiye

shaad us se hoñ ki is qātil-e-ālam ne ḳhud aaj
kah ke o āshiq-e-nāshād pukārā mujh ko

ishq un kī balā jaane āshiq hoñ to pahchāne
lo mujh ko atibbā ne saude kā ḳhalal jaanā

bulbul-e-pāk-bīñ hai āshiq-e-gul
bāġhbāñ tū na khaTkhaTā khaTkā

āshiq ko na le jaa.e ḳhudā aisī galī meñ
jhāñke na jahāñ rauzan-e-dīvār se koī

ārzū-mand-e-shahādat āshiq-e-sādiq hue
ġhair ko Dar hai tirī talvār kā fe.al-e-abas

kuchh ḳhabar bhī hai tujhe chal fātiha ke vāste
aaj haiñ ai shoḳh tere āshiq-e-muflis ke phuul

vafā-pesha āshiq nahīñ dekhā tum ne mujhe dekh lo jāñch lo aazmā lo
tumhāre ishāre pe qurbān kar duuñ abhī māya-e-zindagānī kaho to

jo āshiq ho use sahrā meñ chal jaane se kyā nisbat
juz apnī dhuul uḌānā aur vīrāne se kyā nisbat

terā āshiq thā to le ye tābūt
āḳhirī kiil bhī tū hī Thoke

ye kachchī umr ke āshiq ko dekho
zarā rūThe kalā.ī kāTtā hai

ham to sīrat-pasand āshiq haiñ
ḳhūb-rū kyā jo ḳhush-mizāj nahīñ

apne āshiq haiñ apne vārafta
aap hī apne dil-rubā haiñ ham

āshiq-e-jāñ-bāz haiñ ham muñh na moḌeñge kabhī
tum kamāñ se tiir chhoḌo imtihāñ ho jā.egā

hijr-zada ik āshiq mahv-e-ġham akasr
maazī ke aurāq palaTtā rahtā hai

nāz-bardār dūsrā mujh sā
kaun āshiq hai us kā naam to lo

mirā kuchh haal kah kar zikr-e-majnūñ karte haiñ āshiq
kitāb-e-āshiqī meñ apnā qissa pesh-ḳhvānī hai

daañt piisā na karo āshiq par
jaan yuuñ hoñTh chabāyā na karo

agar hotā mujhe paas aabrū kā
na terā āshiq-e-dīdār hotā