Tags-Aansoo

aañsū roke nuur nahā.e
dil dariyā tan sahrā chāñd

na nīndeñ thiiñ na aañsū the na ḳhushiyāñ thiiñ magar tū thā
ki ab tū bhī nahīñ aatā hai in be-ḳhvāb āñkhoñ meñ

shabnam ne ro ke jī zarā halkā to kar liyā
ġham us kā pūchhiye jo na aañsū bahā sake

aañsū aur palak tak aa.e
aañsū agnī-bān hai sā.īñ

hañste hue dekh kar guloñ ko
shabnam aañsū bahā rahī hai

pī to luuñ āñkhoñ meñ umDe hue aañsū lekin
dil pe qaabū bhī to ho zabt kā yaarā bhī to ho

charāġh-e-ishq hai aañsū se raushan
kisī kā ḳhūn-e-dil roġhan kisī kā

bahut zoroñ se hañs paḌtā huuñ maiñ bin baat ke aksar
maiñ yuuñ aañsū bahāne ke bahāne DhūñD letā huuñ

hamāre shahr-e-dard-ābād meñ lohū ke aañsū se
vahāñ kā daar jab suulī diyā mansūr ro detā

jhiil āñkhoñ meñ surmagīñ aañsū
chāñd be-ḳhud thā is nazāre par

maiñ is liye bhī tire fan kī qadr kartā huuñ
tū jhuuT bol ke aañsū nikāl letā hai

vo koī ḳhush-bū hai merī saañs meñ bahtī huī
maiñ koī aañsū huuñ us kī ruuh meñ girtā huā

rāt-din aañsū bahe mātam huā
dard furqat kā na lekin kam huā

hamārī ruuh kā hissa hamāre aañsū haiñ
inheñ bhī shauq-e-azīyyat pe vārte haiñ ham

lab pe duā.eñ aañkh meñ aañsū jalte haiñ
milne aur bichhaḌne vaalā koī to ho

motī hai ye palak par ruḳhsār par hai shabnam
gir kar zamīñ pe aañsū be-ābrū kare hai

is bastī meñ is dhartī par sairābī-e-jāñ kā haal na pūchh
yaañ āñkhoñ āñkhoñ aañsū haiñ aur dariyā dariyā paanī hai

terī yaad ke saath aate na aañsū
agar mujh ko tujh se mohabbat na hotī

aaj bhī 'yāvar' hañste hañste aañkh meñ aañsū aa jaate haiñ
dard kī maujeñ ḳhuun kī lahreñ aag kā dariyā kyā nahīñ dekhā

bhīgī palkeñ shauq kā aalam vaqt kā dhārā kyā nahīñ dekhā
hañste aañsū talḳh tabassum mīThā ġhussa kyā nahīñ dekhā