Tags-Aansoo

palkoñ pe larazte hue taare se ye aañsū
ai husn-e-pashīmāñ tire qurbān ga.e ham

nahīñ rukte ghaḌī-bhar tālib-e-dīdār ke aañsū
ye zālim shauq goyā aañkh kā nāsūr hotā hai

bichhī thiiñ har taraf āñkheñ hī āñkheñ
koī aañsū girā thā yaad hogā

raat thak kar aan girtā hai mire jalte badan kī aañch par
apne aañsū mere gāloñ par Dhalakte dekhtā rahtā hai vo

ajab rūdād hai apnī bayāñ karte haiñ ham jis se
nikal aate haiñ aañsū us ko riqqat aa hī jaatī hai

dukh jaatā hai jab dil to ubal paḌte haiñ aañsū
'mullā' ko dikhāne kā taḌapnā nahīñ aatā

'farhat' kī har hañsī meñ haiñ aañsū chhupe hue
us kī ḳhushī bhī oḌhe hue hai ridā-e-ġham

chāhiye hotī hai kisht-e-zar ko jab bhī kuchh numū
maiñ bahā detā huuñ kuchh aañsū ḳhas-o-ḳhāshāk meñ

bichhaunā bhī nahīñ hai aaj 'tālib'
taḌap ġham niiñd aañsū kyā bichhā.eñ

farq ye hai nutq ke sāñche meñ Dhal saktā nahīñ
varna jo aañsū hai durr-e-shāh-vār-e-naġhma hai

mirā ḳhāmosh rah kar bhī unheñ sab kuchh sunā denā
zabāñ se kuchh na kahnā dekh kar aañsū bahā denā

añdhere zaḳhm masā.il dhuāñ lahū aañsū
gañvāte ham bhī kahāñ tak virāsateñ thiiñ bahut

sāvan aayā lekin sūkhī ehsāshoñ kī hariyālī
banjar dil meñ aañsū bo.e uupar se barsā.ī raat

dil kā aalam bhī huā hai ālam-e-hū kī tarah
aañkh meñ tū har ghaḌī rahtā hai aañsū kī tarah

khule siine ke dāġhoñ par Thahar rahte haiñ kuchh aañsū
chaman meñ mahr-varzī ke gul-o-shabnam haiñ ye donoñ

ye vo nam-nākiyāñ haiñ jo havā deñgī alaav ko
ye vo aañsū haiñ jo ḳhud ko sharar kar ke dikhā.eñge

gar kisī jashn-e-masarrat meñ chale bhī jaa.eñ
chun ke aañsū tire ġham-ḳhvār uThā lā.eñge

samajhtā huuñ sabab kāfir tire aañsū nikalne kā
dhuāñ lagtā hai āñkhoñ meñ kisī ke dil ke jalne kā

maiñ us kī bārishoñ kā muntazir huuñ
vo mujh se mere aañsū māñgtā hai

saare aañsū pī jaatī hai
maañ se nisbat hai chādar kī