Tags-Aansoo

aañkh se aañsū nikal jā.eñge aur Tahnī se phuul
vaqt badlegā to sab qaidī rihā ho jā.eñge

merī mahbūb ye aañsū haiñ ki motī ruḳh par
un ko is tarah na bekār gañvā maan bhī jā

vo aa ga.e haiñ to aañsū zarūr poñchheñge
ab aañkh kyuuñ mirī ashkoñ se tar nahīñ hotī

maiñ ik aañsū hī sahī huuñ bahut anmol magar
yuuñ na palkoñ se girā kar mujhe miTTī meñ milā

aa ke chehre pe jam gayā aañsū
ban ke motī rahā hai āñkhoñ meñ

tum ko aañsū nazar nahīñ aatā
yaañ samundar chhupā hai āñkhoñ meñ

ise tahzīb-e-ġham kā naam ahl-e-dard dete haiñ
mire aañsū kabhī dāman tumhārā nam nahīñ karte

sunā bhī kabhī mājrā dard-o-ġham kā kisī dil-jale kī zabānī kaho to
nikal aa.eñ aañsū kaleja pakaḌ lo karūñ arz apnī kahānī kaho to

'tarīr' aañsū haiñ aur dhundhlāhateñ haiñ
ye kaisī kahkashāoñ kī jilau hai

khul ke rone kī tamannā thī hameñ
ek do aañsū nikal kar rah ga.e

jab bhī do aañsū nikal kar rah ga.e
dard ke unvāñ badal kar rah ga.e

nāseh ne merā haal jo mujh se bayāñ kiyā
aañsū Tapak paḌe mire be-iḳhtiyār aaj

zāhir meñ hañse vo magar aañsū nikal aa.e
thā koī asar bhī mire marne kī ḳhabar meñ

ye vo aañsū haiñ jo andar kī taraf girte haiñ
hoñ bhī to ham nazar aate nahīñ giryāñ baabā

larzāñ tarsāñ bar-sar-e-mizhgāñ ḳhuun ke aañsū haiñ 'tāriq'
sham-e-farozāñ shahr meñ le kar ḳhūnī manzar dekhā hai

mere aañsū meñ ḳhushbū mere har naale meñ raag
ab to har ik saañs meñ shāmil tumheñ paatā huuñ maiñ

'amjad' matā-e-umr zarā dekh-bhāl ke
aisā na ho ki ba.ad meñ aañsū bahā.iye

ek tūfān kī aamad aamad
ek aañsū koī roke roke

dekhiye jab bhī mizha par hai ik aañsū 'aḳhtar'
dīda-e-tar kī rifāqat nahīñ dekhī jaatī

chashm-e-paimāna se Tapkā aañsū
koī be-chāra savābī hogā