saath ho koī to kuchh taskīn sī paatā huuñ maiñ
tere aage jā ke tanhā aur ghabrātā huuñ maiñ
sāmne aate hī un ke chup sā ho jaatā huuñ maiñ
jaise ḳhud apnī tamannāoñ se sharmātā huuñ maiñ
ik musalsal zabt hī kā naam shāyad ishq hai
ab to nazroñ tak ko āñkhoñ hī meñ pī jaatā huuñ maiñ
dekh sakte kaash tum merī tamannāoñ kā jashn
jab unheñ jhūTī ummīdeñ de ke bahlātā huuñ
mere pairoñ ko hai kuchh roñdī huī rāhoñ se bair
jis taraf koī nahīñ jaatā udhar jaatā huuñ maiñ
ik nigāh-e-lutf aate hī vahī hai hāl-e-dil
sab purāne tajraboñ ko bhuul sā jaatā huuñ maiñ
ye mire ashk-e-musalsal bas musalsal ashk haiñ
kaun kahtā hai tumhārā naam dohrātā huuñ maiñ
shām-e-ġham kyā kyā tasavvur kī haiñ chīra-dastiyāñ
haañ tumheñ bhī tum se bin pūchhe uThā laatā huuñ maiñ
kārobār-e-ishq meñ duniyā kī jhūTī maslahat
mujh ko samjhāte haiñ vo aur dil ko samjhātā huuñ maiñ
saath tere zindagī kā vo tasavvur meñ safar
jaise phūloñ par qadam rakhtā chalā jaatā huuñ maiñ
rañj-e-insāñ kī haqīqat meñ to samjhā huuñ yahī
aaj duniyā meñ mohabbat kī kamī paatā huuñ maiñ
mere aañsū meñ ḳhushbū mere har naale meñ raag
ab to har ik saañs meñ shāmil tumheñ paatā huuñ maiñ
ab tamannā be-sadā hai ab nigāheñ be-payām
zindagī ik farz hai jiitā chalā jaatā huuñ maiñ
haa.e 'mullā' kab milī ḳhāmoshī-e-ulfat kī daad
koī ab kahtā hai kuchh un se to yaad aatā huuñ maiñ