Tags-Barg

kyā kyā na tere sadme se bād-e-ḳhizāñ girā
gul barg sarv fāḳhta kā āshiyāñ girā

jaane kyā huā ham ko ab ke fasl-e-gul meñ bhī
barg-e-dil nahīñ larzā terī yaad jab guzrī

ḳhaak meñ milte hue barg-e-ḳhizāñ se pūchhiye
kaun shāḳhoñ se use ūñchī havā tak le gayā

ḳhvāb chuntī huī āñkheñ haiñ parindoñ kī tarah
aur ye jism ki jaise koī be-barg shajar

sher kyā hai niim bedārī meñ bahnā mauj kā
barg-e-gul par niiñd meñ shabnam ke girne kī sadā

ḳhaar kī har nok ko majrūh kar dene ke ba.ad
lauT jaanā hai mujhe barg-o-samar ke aas paas

is dasht se ho kar bhī ik sail-e-anā niklā
kuchh barg-e-shajar TuuTe kuchh zor-e-havā niklā

ab to vo barg-e-ārzū bhī havā
le ga.ī hai uḌā ke itnī duur

lahlahāte the chaman maftūñ guloñ par the bahār
luT ga.ī bū-bās ai barg-e-ḳhizānī ab kahāñ

mauj-e-gul barg-e-hinā āb-e-ravāñ kuchh bhī nahīñ
is jahān-e-rañg-o-bū meñ jāvedāñ kuchh bhī nahīñ

barg-e-jāñ hai.at-e-ajzā kā pareshān sā juz
dekhte dekhte ashkāl badal detā hai

shajar se ik umr kī rifāqat ke silsile haiñ
nigāh ab dekhtī hai barg o samar se aage

muqābil aate hī yuuñ khīñch le hai dil vo shoḳh
ki jaise kāh-rubā jazb barg kaah kare

girī dhaḌām se ghāyal peḌoñ kī niilī dīvār
kaTte haikal jhaḌte pinjar chhaTte barg-o-bār

maiñ barg-e-shikasta huuñ dast-e-havā par
faqat merā vahm-o-gumāñ ye khule par

sivā.e gul ke vo shoḳh añkhiyāñ kisī taraf ko nahīñ haiñ rāġhib
to barg-e-nargis upar bajā hai likhūñ jo apne sajan kuuñ patiyāñ

paanī se sag-gazīda Dare jis tarah 'asad'
Dartā huuñ aa.ine se ki mardum-gazīda huuñ

chaman meñ nāḳhun-e-har-barg-e-gul se bulbul kī
hazār rañg se uqda-kushā.iyāñ dekhīñ

haiñ tarannum-rez yaksar shāḳh-o-barg-o-bār aaj
ban gayā hai resha resha tār-e-mausīqār aaj