Tags-Zindan

ban gayā qaid kā farmān bhī rāhat kī naved
hue tārīkī-e-zindāñ meñ tire baal saped

kahtā hai us kī zulf meñ phañs kar ye murġh-e-dil
qaidī to huuñ 'jamīla' pa zindāñ se duur huuñ

ye bastī hai ki zindāñ kuchh bhī to palle nahīñ paḌtā
the kab pachhuā ke din aur kab se purvā.ī safar meñ hai

zindāñ kī dil-shikasta tanhā.iyoñ meñ koī
dīvār-o-dar se jaane kyā guftugū kare hai

haiñ aaj bhī vahī dār-o-rasan vahī zindāñ
har ik nigāh-e-rumūz-āshnā ke raste meñ

ye kū-e-yār ye zindāñ ye farsh-e-mai-ḳhāna
inheñ ham ahl-e-tamannā ke naqsh-e-pā kahiye

gul bantī hai shāyad ḳhāk-e-vatan shāyad ki safar kartī hai ḳhizāñ
ḳhushbu-e-bahārāñ miltī hai kuchh din se havā-e-zindāñ meñ

ġhairoñ kī ḳhalish apnoñ kī lagan soz-e-ġham-e-jānāñ dard-e-vatan
kyā kahiye ki ham haiñ kis kis ko siine se lagā.e zindāñ meñ

ye jabr-e-siyāsat ye insāñ mazlūm aaheñ majbūr fuġhāñ
zaḳhmoñ kī mahak dāġhoñ kā dhuāñ mat pūchh fazā-e-zindāñ meñ

raftār-e-zamāna lai jin kī gaatī hai gul-e-naġhma jin kā
ham gaate haiñ un āvāzoñ se āvāz milā.e zindāñ meñ

sad-chāk qabā-e-amn-o-sukūñ uryāñ hai ahinsā.ī kā junūñ
kuchh ḳhuuñ se shahīdoñ ne apne vo gul haiñ khilā.e zindāñ meñ

jismoñ pe ye kis kā nām-e-siyah likh dete haiñ koḌoñ ke nishāñ
haiñ taak meñ kis kī zanjīreñ ab aañkh lagā.e zindāñ meñ

ho teġh-e-asar zanjīr-e-qadam phir bhī haiñ naqīb-e-manzil ham
zaḳhmoñ se charāġh-e-rāhguzar baiThe haiñ jalā.e zindāñ meñ

mujrim the jo ham so qaid hue sayyād magar ab ye to batā
har vaqt ye kis ko DhūñDte haiñ dīvār ke saa.e zindāñ meñ

jis dam ye sunā hai sub.h-e-vatan mahbūs fazā-e-zindāñ meñ
jaise ki sabā ai ham-qafso betāb ham aa.e zindāñ meñ

jo santarī dar-e-zindāñ ke bhī so jā.eñge
ye raag gā ke unheñ niiñd se jagā.eñge

saarī duniyā meñ ghanī raat kā sannāTā thā
sehn-e-zindāñ meñ mile sub.h ke āsār mujhe

sehn-e-zindāñ meñ hai phir raat ke tāroñ kā hujūm
sham.a kī tarah farozāñ sar-e-dīvār āñkheñ

har asr kī taḳhlīq meñ kuchh haath hai merā
maiñ vaqt ke zindāñ meñ bhī āzād rahā huuñ

be-dhaḌak aa.e na zindāñ meñ nasīm-e-vahshat
mast kar detī hai zanjīr kī āvāz mujhe