Tags-Zindan

na yuuñ TūTīñ na TūTeñgī kabhī zindāñ kī dīvāreñ
koī sar phoḌ kar mar jaa.e mar jaane se kyā hāsil

abhī baaqī hai ik ummīd-e-marg-e-nā-gahāñ lekin
usī zindāñ meñ phir aa.e to mar jaane se kyā hāsil

na.ī zanjīr hai duniyā kā har ik hañgāma
asl meñ qaid hai zindāñ se rihā ho jaanā

vo sub.h-e-rihā.ī thī yā shām-e-asīrī thī
jab maiñ dar-e-zindāñ se zanjīr uThā laayā

zindāñ meñ phañse tauq paḌe qaid meñ mar jaa.e
par dām-e-mohabbat meñ giraftār na hove

ham ne zindāñ kī bāġhbānī kī
mausam-e-gul ke ham asiir na the

jhāñkne ko idhar aa.ī na kabhī bād-e-bahār
jab se ham aa.e na aayā sū-e-zindāñ koī

apnā hī to hai shahkār-e-amal tahzīb kā ye zindāñ 'akbar'
ham aaj haiñ shahroñ ke qaidī kal tak āvāra-e-sahrā the

ab bhī āzād fazāoñ kā na imkāñ niklā
bāb-e-gulshan jise samjhe dar-e-zindāñ niklā

pīr-e-kan.āñ ko diyā dard-e-firāq
yūsuf-e-misr ko zindāñ baḳhshā

raftār-e-zamāna lai jin kī gaatī hai gul-e-naġhma jin kā
ham gaate haiñ un āvāzoñ se āvāz milā.e zindāñ meñ

sad-chāk qabā-e-amn-o-sukūñ uryāñ hai ahinsā.ī kā junūñ
kuchh ḳhuuñ se shahīdoñ ne apne vo gul haiñ khilā.e zindāñ meñ

jismoñ pe ye kis kā nām-e-siyah likh dete haiñ koḌoñ ke nishāñ
haiñ taak meñ kis kī zanjīreñ ab aañkh lagā.e zindāñ meñ

ho teġh-e-asar zanjīr-e-qadam phir bhī haiñ naqīb-e-manzil ham
zaḳhmoñ se charāġh-e-rāhguzar baiThe haiñ jalā.e zindāñ meñ

mujrim the jo ham so qaid hue sayyād magar ab ye to batā
har vaqt ye kis ko DhūñDte haiñ dīvār ke saa.e zindāñ meñ

jis dam ye sunā hai sub.h-e-vatan mahbūs fazā-e-zindāñ meñ
jaise ki sabā ai ham-qafso betāb ham aa.e zindāñ meñ

gul bantī hai shāyad ḳhāk-e-vatan shāyad ki safar kartī hai ḳhizāñ
ḳhushbu-e-bahārāñ miltī hai kuchh din se havā-e-zindāñ meñ

ġhairoñ kī ḳhalish apnoñ kī lagan soz-e-ġham-e-jānāñ dard-e-vatan
kyā kahiye ki ham haiñ kis kis ko siine se lagā.e zindāñ meñ

ye jabr-e-siyāsat ye insāñ mazlūm aaheñ majbūr fuġhāñ
zaḳhmoñ kī mahak dāġhoñ kā dhuāñ mat pūchh fazā-e-zindāñ meñ

kisī zindāñ meñ sochnā hai abas
dahr ham meñ hai yā ki dahr meñ ham