Tags-Zindagi

yahīñ tahrīr hai lamhāt-e-sar-basta ke afsāne
kitāb-e-zindagī ke har varaq par ik kahānī hai

maiñ apnī zindagī kī note-bōk se kitnī rāteñ kitne din kāTūñ
ki ik ik raat meñ kitnī qayāmat-ḳhez rāteñ mujh pe TuuTī haiñ

sunā hai zindagī vīrāniyoñ ne luuT lī mil kar
na jaane zindagī ke nāz-bardāroñ pe kyā guzrī

āsmāñ mil na sakā dhartī pe aayā na gayā
zindagī ham se koī Thaur banāyā na gayā

kab Dhalegī shām-e-ġham kab ḳhatm hogā zulm-o-jabr
zindagī insāñ kī hai unvāñ fasāne kā nahīñ

guzartī hai bashar kī zindagī kis vahm-e-bātil meñ
jo aisā ho to aisā ho jo aisā ho to aisā ho

jo umr-bhar kā saath nibhātā na mil sakā
vaise to zindagī meñ bahut ġham mile hameñ

dil ne jab bhī koī saada sī tamannā kī hai
zindagī ek nayā zaḳhm lagā laa.ī hai

zindagī naam hai ik johd-e-musalsal kā 'fanā'
rāh-rau aur bhī thak jaatā hai ārām ke ba.ad

zindagī mehrbāñ nahīñ to phir
maut kyuuñ dard-āshnā hogī

mujhe ab dekhtī hai zindagī yuuñ be-niyāzāna
ki jaise pūchhtī ho kaun ho tum justujū kyā hai

zindagī khel hai Darāme kā
har khilāḌī pe zimmedārī hai

maiñ to har saañs ko detā rahā jiine kā ḳhirāj
zindagī phir bhī kabhī raas na aa.ī mujh ko

ik na.e ġham se shanāsā kiyā mahrūmī ne
zindagī jab bhī tirī bazm meñ laa.ī mujh ko

yuuñ bhī dahakte dasht se kyā kam thī zindagī
be-kār dhuup kuud paḌī darmiyān meñ

zindagī ko zarā shatranj samajh kar dekho
mere jhuk jaane meñ tadbīr bhī ho saktī hai

zindagī film nahīñ jis kā ho anjām hasīñ
sūrat-e-hāl ye gambhīr bhī ho saktī hai

badal de ruḳh jo mirī zindagī ke dhāroñ kā
vo hādisa mire dil par abhī kahāñ guzrā

ik fusūñ-kār but-tarāsh huuñ maiñ
zindagī kī tavīl rātoñ ko

yuuñ to ik kohna but-tarāsh huuñ meñ
zindagī kī tavīl rātoñ ko