Tags-Azal

muqaddar ne kahāñ koī nayā paiġhām likkhā hai
azal hī se varaq par dil ke terā naam likkhā hai

guzar rahe the vo hastī ke mujrimān-e-azal
qadam baḌhā.e hue maiñ kahāñ chalā aayā

asrār do-ālam ke khulte haiñ 'razā' dil par
takvīn-e-azal kā hai mahram dil-e-dīvāna

sahar-e-azal ko jo dī ga.ī vahī aaj tak hai musāfirī
use tai kareñ to pata chale kahāñ kaun kis kī talab meñ hai

likhnā thā jo kuchh aap ko pahle hī likh diyā
hāl-e-abad bhī daftar-e-roz-e-azal meñ hai

dast-e-junūñ ne phaaḌ ke pheñkā idhar-udhar
dāman abad meñ hai to garebāñ azal meñ hai

sān.e.a ne vo dahan na banāyā na kuchh likhā
ḳhālī jagah navishta-e-roz-e-azal meñ hai

azal se chāñd meñ charḳha chalā rahī hai magar
'navāz' ab bhī vo buḌhiyā niDhāl thoḌī hai

zamāna is kī ḳhvāhish meñ azal se chuur hai jānāñ
mohabbat nuur hai jānāñ

hashr meñ husn se 'ravish' shikva-e-rū-ba-rū ġhalat
roz-e-azal kī baat hai aaj hī yaad aa.e kyuuñ

aaj tak sub.h-e-azal se vahī sannāTā hai
ishq kā ghar kabhī sharminda-e-mehmāñ na huā

ho jis par yaqīñ tum ko 'shāhīñ' azal se
use apne vahm-o-gumāñ hī meñ DhūñDo

ham sar-e-tūr bhī pahuñche magar ai husn-e-azal
tere milne kā na phir bhī koī imkān huā

uThā ke rakh do kitāb-e-firāq ko dil meñ
ki ye fasāna azal se mirā sunā huā hai

azal se kisī shai meñ gardish na thī
chalā maiñ to sansār chalne lagā

duniyā se laḌā.ī to azal hī se rahī hai
ab ḳhud se jhagaḌne kī bhī maiñ Thaan rahā huuñ

fitratan ishq-e-girāñ gosh-e-azal hī se hai
tālib-e-lutf do-gūna hai vo bahrā ho kar

khulte jaate haiñ kā.enāt ke bhed
jo azal hai vahī abad hai yahāñ

ḳhushāmad tābedārī minnat-o-ḳhidmat sujūd-e-husn
azal se dīdanī hai bebasī-o-ājizī-e-ishq

o vajūd-e-chaman-ārā-e-azal ke munkir
ḳhud-baḳhud gul hue maujūd na ḳhaar aap se aap