Tags-Waqt

bharā huā tirī yādoñ kā jaam kitnā thā
sahar ke vaqt taqāzā-e-shām kitnā thā

hameñ ye vaqt Darātā kuchh is tarah bhī hai
Thahar na jaa.e kahīñ hādsa guzarte hue

vaqt kī umr kyā baḌī hogī
ik tire vasl kī ghaḌī hogī

kuchh is qadar the havās gum-sum ki vaqt-e-hijrat
bilakte bachchoñ ko pyaar maiñ ne nahīñ kiyā thā

mire ahbāb kyā be-vaqt mere paas aa baiThe
ghaTā ghanghor thī vo apne kamre meñ akelā thā

dasht-e-hayāt se koī guzrā hai is tarah
gard-e-qadam se vaqt kā chehra bhī aT gayā

vaqt-e-ḳhush un kā jo ham-bazm haiñ tere ham to
dar-o-dīvār ko ahvāl sunā jaate haiñ

āḳhirī ummīd vaqt-e-naza.a un kī diid thī
maut ko bhī mil gayā fiqara na aane ke liye

aaj dariyā nahīñ kuuze meñ samāne vaalā
vaqt hai mujh pe mirā zo.am-e-hunar khul jaa.e

kabhī to vaqt kī gardish thakā bhī detī hai
so thaam kar tirī dīvār saañs lete haiñ

rahtī hai kisī aur taraf aas nazar kī
haiñ vaqt ke hāthoñ meñ alam aur tarah ke

vaqt hai naag tire jism ko Dastā hogā
yaḳh kar tujh ko havā.eñ bhī biphartī hoñgī

naqsh hai vaqt kī peshānī pe ahd-e-rañgīñ
ham se go ruk na sakī umr-e-gurezāñ ai dost

kitne hī peḌ ḳhauf-e-ḳhizāñ se ujaḌ ga.e
kuchh barg-e-sabz vaqt se pahle hī jhaḌ ga.e

hai aaj vaqt 'zafar' dil kī baat kah Dāleñ
kabhī to vo bhī zarā apnā dil TaTolegā

mahmil-e-vaqt meñ raushan haiñ farāsat ke charāġh
phir bhī auhām kī lau tez huī jaatī hai

roz-o-shab chain se guzarte haiñ
vaqt meñ pech-o-tāb thā na rahā

bichhaḌne vaale ne vaqt-e-ruḳhsat kuchh is nazar se palaT ke dekhā
ki jaise vo bhī ye kah rahā ho tum apne ghar kā ḳhayāl rakhnā

yaad rakh! vaqt ke andāz nahīñ badleñge
are allāh ke bande tire ghabrāne se

bichhaḌte vaqt us ne jo kahā thā
usī iqrār ne chauñkā diyā thā