Tags-Visaal

tasavvur meñ visāl-e-yār ke sāmān hote haiñ
hameñ bhī yaad haiñ hasrat kī bazm-ārā.iyāñ kyā kyā

visāl-e-dā.imī kā hai tasavvur
bahār-e-be-ḳhizāñ hai aur maiñ huuñ

girnī thī ham pe barq-e-tajallī na tuur par
dete haiñ baada zarf-e-qadah-ḳhvār dekh kar

baazī hai jaan hijr hai haar aur visāl jiit
ġham hai bisāt-e-dil kuuñ mire nard boliye

ġham-e-hijr ke ga.e din guzar huā āḳhir apnā visāl hī
pa ye kyā ġhazab hai pa.e-ḳhudā tujhe aaj tak hai malāl hī

maiñ savāl-e-vasl huuñ kar rahā vo ye kahtā hai ki na mānūñgā
ye ajab tarah kā hai maḳhmasa ki na hijr hai na visāl hī

kyā visāl-e-ḳhudā nahīñ hotā
ishq-e-sādiq se kyā nahīñ hotā

tirī chashm-e-tar meñ ravāñ-davāñ ġham-e-ishq kā jo malāl hai
ye hī ibtidā-e-firāq hai ye hī intihā-e-visāl hai

lage hue haiñ jahāñ par visāl ke ḳheme
udhar se hijr kā rahvār bhī guzartā hai

maiñ roz-e-hijr ko barbād kartā rahtā huuñ
shab-e-visāl hī ko yaad kartā rahtā huuñ

kuchh kam nahīñ hoñ lazzat-e-furqat se faiz-yāb
hāsil agar visāl nahīñ hai to kyā huā

kaif-e-ġham-e-firāq kī lazzat jise milī
hāsil use visāl nahīñ hai to kyā huā

isī havā meñ mohabbat kā diip jaltā hai
isī jahāñ ko jahān-e-visāl kar dekho

ab na harīm-e-nāz se hogā tulū āftāb
qurb-e-jamāl to gayā lutf-e-visāl ab nahīñ

tulūa honā ufuq par mah-e-visāl sā kuchh
tire badan kā sar-e-shām rañg-o-bū honā

be-ḳhud the ġhash the mahv the duniyā kā ġham na thā
jiinā visāl meñ bhī to hijrāñ se kam na thā

vo ek lamha jise tum ne chhū ke chhoḌ diyā
us ek lamhe meñ kaif-e-visāl saarā thā

visāl-e-yār se duunā huā ishq
maraz baḌhtā gayā juuñ juuñ davā kī

maḳhfī bhī thā visāl kā vo bāb-e-muḳhtasar
kuchh dil bhī mahv hijr ke asbāq meñ rahā

thā jo ek lamha visāl kā vo riyāz thā ka.ī saal kā
vahī ek pal meñ guzar gayā jise umr guzrī pukārte