Tags-Tajraba

hādse ūñchī uḌānoñ meñ bahut hote haiñ
tajraba tujh ko nahīñ hai mire baazū le jā

is daur-e-nā-murād se ye tajraba huā
dīvār guftugū ke liye behtarīn hai

yahāñ to dil kī bāteñ haiñ hamārā tajraba hai ye
jo sat.h-e-āb par rakhiye to paisa Duub jaatā hai

samajh meñ na aa.e to merī ḳhamoshī ko dil par na lenā
ki ye aql vāloñ kī dānist se māvarā tajraba hai

to kyā ik hamāre liye hī mohabbat nayā tajraba hai
jise pochhiye vo kahegā ki jī haañ baḌā tajraba hai

kisī aur ke tajarbe se koī fā.eda kyā uThā.eñ
mohabbat meñ har tajraba hī alag tarah kā tajraba hai

vo apnī jagah ḳhush-gumāñ thī ki daa.im hai pahlī mohabbat
maiñ apne ta.iiñ mutma.in thā ki ye dūsrā tajraba hai

magar ham musir the ki ham ne kitābeñ bahut paḌh rakhī haiñ
baḌoñ ne kahā bhī ki dekho miyāñ tajraba tajraba hai

kaThin to bahut hai magar dil ke rishtoñ ko āzād chhoḌo
tavaqqo.a na bāñdho ki ye ik aziyyat bharā tajraba hai

tujhe chhūnā nirālā tajraba thā
vo jhūTā hai jo maḳhmal likh rahā hai

har ik ke tajarbe se muḳhtalif hai tajraba merā
na kyuuñ sab se alag ho zindagī par tabsira merā

umr ke lambe safar se tajraba aisā milā
dhuup jab bhī sar pe aa.ī lāpatā saaya milā

pyaar to janm kā akelā thā
kyā mirā tajraba akelā thā

mushāhida na koī tajraba na ḳhvāb koī
tamām sher-o-suḳhan harf-o-ijtināb koī

hamāre qatl se qātil ko tajraba ye huā
lahū lahū bhī hai mehñdī bhī hai sharāb bhī hai

tumhārā tajraba shāyad alag ho
mujhe to ilm ne bhaTkā diyā hai

hameñ bhī tajraba hai be-gharī kā chhat na hone kā
darinde, bijliyāñ, kaalī ghaTā.eñ shor kartī haiñ

hamārā tajraba ye hai ki ḳhush honā mohabbat meñ
kabhī mushkil nahīñ hotā kabhī āsāñ nahīñ hotā

tajraba laakh kījiye is par
phir bhī patthar pighal nahīñ saktā

bikhar rahā huuñ tirī tarah maiñ bhī ai zar-e-gul
so tujh se pūchhtā huuñ terā tajraba kyā hai