Tags-Tajahul

kyuuñ tajāhul ko ārifāna kahūñ
mere chehre ko ajnabī kahiye

thā jo sutūñ ki rukn-e-risālat kā takiya-gāh
kursī bhī us kī pusht kī thī DhūñDhtī panāh

ye tajāhul ārifāna hai janāb
bhuul kar jaanā na ġhāfil ke qarīb

ik sheva taġhāful hai ik ishva tajāhul hai
ġhussa hai bajā terā shikva mirā bejā hai

ye ḳhuub jāntā huuñ kasī ko karoge qatl
ḳhanjar kamar meñ aap tajāhul se bāñdhiye

allāh re tajāhul mire ahbāb se pūchhā
dīvāna hai kyā 'sābir'-e-farzāna kisī kā

yuuñ to na tasāhul na taġhāful na tajāhul
kuchh aur hai us kāfir-e-tannāz kā aalam

ab us ke tarz-e-tajāhul ko kyā kahe koī
vo be-ḳhabar to nahīñ phir bhī be-ḳhabar sā lage

marīz-e-mohabbat tirā jāñ-ba-lab hai
tajāhul sitam hai taġhāful ġhazab hai

tajāhul ne un ke hameñ maar Daalā
jab aate haiñ kahte haiñ kyā ho rahā hai

jhijakte se qadam bahkī sī nazreñ ruktī sī bāteñ
ye andāz-e-tajāhul vo hai jis ko ham samajhte haiñ

rashk-e-gul baaġh meñ baiThā thā to ham bhī 'ehsāñ'
ye ġhazal paḌhte hue vaañ ba-tajāhul pahuñche

is ishāre ke fidā aise tajāhul ke nisār
maar kar aañkh vo muñh pher liyā karte haiñ

haa.e tajāhul aaj hamīñ se pūchh rahe haiñ ahl-e-ḳhirad
sunte haiñ is shahr meñ rahtā hai koī dīvāna bhī

yaad aatā hai vo andāz-e-tajāhul ai dost
baat auroñ se magar rū-e-suḳhan dil kī taraf

ham jinheñ 'hosh' tajāhul se ḳhatā samjhe the
nāvak-e-nāz vo sab dil meñ tarāzū nikle

kyā tajāhul hai ki vo farmāte haiñ aġhyār se
maiñ nahīñ pahchāntā mutlaq ki 'āġhā' kaun hai

hue haiñ mahrūm-e-dīd-e-be-dil kiyā tajāhul kā us ne bismil
vo dil-rubā ban gayā hai qātil kamar ko kas ke safar ko chaliye

tajāhul-peshgī se mudda.ā kyā
kahāñ tak ai sarāpā naaz kyā kyā

kareñ jo aap tajāhul to kyuuñ na samjhā.ūñ
kare huzūr kahāñ tak vafā-shi.ār lihāz