Tags-Tajahul

ye ḳhuub jāntā huuñ kasī ko karoge qatl
ḳhanjar kamar meñ aap tajāhul se bāñdhiye

tajāhul ne un ke hameñ maar Daalā
jab aate haiñ kahte haiñ kyā ho rahā hai

ye tajāhul ārifāna hai janāb
bhuul kar jaanā na ġhāfil ke qarīb

kyā tajāhul hai ki vo farmāte haiñ aġhyār se
maiñ nahīñ pahchāntā mutlaq ki 'āġhā' kaun hai

marīz-e-mohabbat tirā jāñ-ba-lab hai
tajāhul sitam hai taġhāful ġhazab hai

thā jo sutūñ ki rukn-e-risālat kā takiya-gāh
kursī bhī us kī pusht kī thī DhūñDhtī panāh

yaad aatā hai vo andāz-e-tajāhul ai dost
baat auroñ se magar rū-e-suḳhan dil kī taraf

tajāhul apnī jafāoñ pe aur mahshar meñ
ḳhudā ke sāmne kahte ho tum ḳhayāl nahīñ

nigāh-e-lutf se dekho hameñ bhī husn-ārā
kahāñ hai rañg-e-tajāhul ye dāḳhil-e-hasnāt

yuuñ to na tasāhul na taġhāful na tajāhul
kuchh aur hai us kāfir-e-tannāz kā aalam

kyā tajāhul se ye kahtā hai kahāñ rahte ho
tire kūche meñ sitamgār tire kūche meñ

gum-karda sukūñ pā ke mujhe apnī galī meñ
kahnā vo tajāhul se kidhar yaad to hogā

un ne pahchān kar hameñ maarā
muñh na karnā idhar tajāhul thā

kareñ jo aap tajāhul to kyuuñ na samjhā.ūñ
kare huzūr kahāñ tak vafā-shi.ār lihāz

allāh re tajāhul mire ahbāb se pūchhā
dīvāna hai kyā 'sābir'-e-farzāna kisī kā

tajāhul-peshgī se mudda.ā kyā
kahāñ tak ai sarāpā naaz kyā kyā

is tajāhul kā kyā Thikānā hai
jaan kar jo na mudda.ā jaane

ik sheva taġhāful hai ik ishva tajāhul hai
ġhussa hai bajā terā shikva mirā bejā hai

hue haiñ mahrūm-e-dīd-e-be-dil kiyā tajāhul kā us ne bismil
vo dil-rubā ban gayā hai qātil kamar ko kas ke safar ko chaliye

jaan kar bhī vo na jāneñ mujh ko
ārifāna hī tajāhul Thahre