Tags-Shama

sham.a jis kī aabrū par jaan de de jhuum kar
vo patiñgā jal to jaatā hai fanā hotā nahīñ

lā sakā ai sham.a dam-bhar bhī na tāb-e-soz-e-ishq
ḳhaak hone ke sivā kyā ḳhaak parvāne meñ thā

phir patañgoñ kā shor uTThā 'sirāj'
jalva-e-sham.a-rū qayāmat hai

raushnī sham.a kī ḳhud gulū-gīr hai hañsnā tahzīb hai jalnā taqdīr hai
vo magar qatra-e-ashk-e-shabnam jise sub.h kī sab se pahlī kiran pā.egī

fursat-e-bazm bhī mālūm ki arbāb-e-nazar
shola-e-sham.a ko ham dosh-e-sabā kahte haiñ

ājizī o ustuvārī mastī o vāraftagī
kis pe ab juz-sham.a betābī-e-parvāna khule

qāmat-e-parvāna qadd-e-sham.a se kam hai abhī
kīmiyā ho le zarā to qad-e-parvāna khule

bahār-e-gulshan-e-hastī hai qaa.em shādī-o-ġham se
jo gul ḳhandāñ hai gulshan meñ to giryāñ sham-e-mahfil meñ

parvāna gird sham.a ke shab do ghaḌī rahā
phir dekhī us kī ḳhaak paḌī do ghaḌī ke baad

husn kī sham.a kā huuñ parvāna
ḳhalq kahtī hai mujh ko dīvāna

vo bazm dekhī hai merī nigāh ne ki jahāñ
baġhair sham.a bhī jalte rahe haiñ parvāne

mirā dil misl parvāne ke thā mushtāq jalne kā
lagī us sham.a suuñ āḳhir lagan āhista-āhista

sham.a ik nā-mahram-e-asrār-e-shab hañgām-e-shām
ik sitāra āḳhir-e-shab aur sahar nā-āshnā

soz-e-sham-e-hijr se shab jal ga.e
Dhalte Dhalte aañsū ham ḳhud Dhal ga.e

jale shabāb ke tūfāñ meñ sham-e-taqvā kyā
bahār-e-nau kī sharāb-e-kuhan kī baat karo

havā ḳhafā thī magar itnī sañg-dil bhī na thī
hamīñ ko sham.a jalāne kā hausla na huā

kiyā andher apne rañj ne un kī kudūrat ne
bujhī sham-e-mohabbat haa.e do dil ke ġhubāroñ meñ

zaḳhmoñ ke jharoke meñ koī sham.a jalā kar
kahtā hai maiñ kuchh aur nahīñ dard-e-vatan huuñ

parvāne kī shab kī shaam huuñ maiñ
yā roz kī sham.a kī sahar huuñ

bazm-e-ishrat meñ jo rahtī hai musalsal raushan
aaj kī raat vahī sham.a bujhā kar dekheñ