idhar aa.e to use paas bulā kar dekheñ
hāl-e-dil us ko zarā aaj sunā kar dekheñ
bazm-e-ishrat meñ jo rahtī hai musalsal raushan
aaj kī raat vahī sham.a bujhā kar dekheñ
zarre zarre meñ haiñ kitne hī manāzir raushan
aap palkoñ kī ye chilman to uThā kar dekheñ
zulmat-e-ġham meñ tajallī kā samāñ ho shāyad
aaj ham apne nasheman ko jalā kar dekheñ
kitne aks ubhre haiñ aur kitne hue haiñ ma.adūm
dil ke ā.īne ko ā.īna dikhā kar dekheñ
muddatoñ se hai jo pahlū meñ laraztā saaya
aaj ham is ko ujāloñ meñ sajā kar dekheñ
ye bhī ik rañg nayā ruup nayā ho shāyad
aaj ḳhud se hī zarā ḳhud ko chhupā kar dekheñ