Tags-Shajar

phir ek shab ye huā ḳhvāb ke shajar se pare
hazār rañg kī āvāz ik dikhā.ī dī

shajar se bichhḌā huā barg-e-ḳhushk huuñ 'faisal'
havā ne apne gharāne meñ rakh liyā hai mujhe

gire hai barq sar-e-tūr-o-dasht-e-sīnā par
koī shajar kahīñ jaltā nazar nahīñ aatā

ḳharāb mausam meñ har shajar se larazte pattoñ ne kyā kahā thā
ki phuul aane lage haiñ ab shāḳh par bahut der ba.ad jā kar

phal jis pe na the, saaya magar sab ke liye thā
chhitnār shajar ab ke vo āñdhī meñ girā hai

tum pe chhā jaate shajar bante jo nanhe paude
tum ne achchhā hī kiyā paañv jamāne na diyā

dhuup meñ baiThī thī apne baaġh meñ aur yuuñ lagā
Tahniyāñ do shajar kī haiñ us ke baazū kī tarah

ijāza ho gayā mojaz-bayānī kā to ham tere
isī tuḳhm-e-tahayyur ko shajar kar ke dikhā.eñge

bekār sī javānī hai jis par sitam na ho
shīrīñ huā shajar pe samar bhī tapan ke ba.ad

kaise na yaad kī khiḌkī meñ Thahartī kal shab
mere kamre meñ sadāoñ kā shajar rakkhā thā

tere āñgan meñ vafāoñ kā shajar rakkhā thā
apne hoñToñ pe duāoñ kā shajar rakkhā thā

vaise to pyaar kī chhāñv se mohabbat thī 'diyā'
par kahīñ dil meñ anāoñ kā shajar rakkhā thā

merī qismat meñ mohabbat kā sitāra hī nahīñ
merī qismat meñ jafāoñ kā shajar rakkhā thā

jaane kyā soch ke fitrat se mohabbat kī thī
mere ajdād ne gaañv kā shajar rakkhā thā

yād-e-jānāñ ke parindoñ ke sukūñ kī ḳhātir
apne siine meñ vafāoñ kā shajar rakkhā thā

mire lahū se jis ke barg-o-bār meñ bahār hai
vahī shajar mire liye salīb kaise ho gayā

shajar se lipaT kar na ro.egī ye
havā jo chalī hai vo sahrā kī hai

maiñ ḳhizāñ-dīda shajar kī tarah gumnām sā thā
mujh ko vaq.at tirī tasvīr banāne se milī

tum kitnā hī ohdoñ se navāzo hameñ lekin
nafrat kā shajar ham se to boyā nahīñ jaatā

kab tak ai bād-e-sabā tujh se tavaqqo rakkhūñ
dil tamannā kā shajar hai to harā ho bhī chukā