dil ko qarār miltā hai aksar chubhan ke ba.ad
nīndeñ suhānī aatī haiñ din kī thakan ke ba.ad
bekār sī javānī hai jis par sitam na ho
shīrīñ huā shajar pe samar bhī tapan ke ba.ad
āñgan thā jab talak ye na dil ko lubhā sakā
yādeñ vatan kī aa.ī haiñ tark-e-vatan ke ba.ad
dāman bhigo ke baiTheñ haiñ ḳhushiyoñ kī raah meñ
aksar bahār aatī hai rut meñ ghuTan ke ba.ad
guzroge jab bhī sahrā se pāoge tum chaman
jaise nigār-e-dasht hai aksar chaman ke ba.ad